4705/2024-2025

Dated Hnahthial, the 19th March, 2025: Vawiin khan Hnahthial DC Meeting Hall-ah Bawrhsap, Pi K.Vanlalruati kaihhruaiin District Level Implementing Committee on Mission Organic Value Chain Development for North East Region (MOVCD-NER), Hnahthial District thutkhawmna chu neih a ni a. Pu F. Lalmuanpuia, Project Manager, Future Foods chuan target village pariat (8) chhunga loneitu 500 te hnenah Sawhthing chi sem chhuak turin peih fel a nih tawh thu a sawi.

Bawrhsap chuan loneitute chhawmdawl a, chawikan an nih theihna tur atana sawrkar laipui hmalakna pawimawh tak mai -MOVCD-NER chungchanga thutkhawmna neih a ni thei chu lawmawm a tih thu a sawi a. Loneitute'n an thlai thar chhuahte man man zawka an hralh chhuah ngei theih nan hma la zel turin Future Foods hruaitute chu chahin chumi tur atan chuan loneitute chuan an thlai thar chhuahte chu chemicals hmanga thar a, sawngbawl a ni lo tih entirna - 'Organic Certification' an neih a pawimawh thu a sawi a. Hemi nei thei tur hian inzirtirna (awareness) neih that a pawimawh thu sawiin loneitute'n an hamthatna an dawn theih turte chu an hriat chian a pawimawh thu a sawi bawk.

Bawrhsap chuan Organic Certification nei thei tura hlen ngai (criteria) te chu a ngaihthlak hnuin Mizoram, tlang ram milin criteria te chuan duan ni ve thei se a pawimawh a a hriat thu a sawi a ni.

F. Lalmuanpuia, State Project Manager, Future Foods chuan Hnahthial District-a target village pariat (8) - South Vanlaiphai, Darzo, Thingsai, Cherhlun, Khawhri, Muallianpui, New Ngharchhip leh Bualpui H ah te loneitu 500 thlan chhuah an nih thu sawiin heng loneitu thlan chhuahte lo ram hi Krishi Mapper hmanga geo tag vek an nih tawh thu a tarlang a. Darzo-ah hian Krishi Mapper hmanga geo tagged, tam berin 90 an awm a, Bualpui H chu tlem berin 15 an awm a ni. Heng farmers thlan chhuahte hnenah hian naktuk atangin Sawhthing chi sem chhuah tura ruahmanna siam niin a hmasa berah Darzo-ah sem a ni ang a. Loneitu 500 thlan chhuahte hnenah hian Sawhthing chi hi Quintal hnih (2) theuhvin sem chhuah tur a ni ang.

MOVCD-NER hnuaia thlai chi sem leh thar chhuah reng reng hi chemicals hmanga sawngbawl loh - 'fully organic' a kalpui tur niin hemi tur atan hian loneitu thlan chhuahte hnenah zirtirna pek tawh a ni a. A tul anga zirtirna la pek leh zel an nih tur thu tarlan a ni bawk.

MOVCD-NER hnuaiah hian Mizoramah Service Providers pathum (3) awmin chung zingah chuan Future Foods hi an tel a. Anni hian block pathum (3) - Hnahthial, W. Phaileng leh Aibawk block te chu changin Hnahthial District chhung bikah hian loneitu in tel khawm - Farmer Producer Company (FPC) pakhat - South Tuipui Organic FPC Ltd. te chu awmin thlai chi leina tur pawisa - 'Seed Money' chu anni kaltlang hian sem chhuah a ni dawn a. Rs. 25,000 theuh loneitu 500 te hnenah hian thlai chi leina tur - 'seed money' hi pek tur a ni ang a. A enkawl zuina tur erawh chu loneitute account-ah direct a thun (Direct Benefit Transfer) a ni thung ang.

He Mission hnuaiah hian a area milin thlai chi hrang hrang chinna hmun tur bik ruat a ni a. Hnahthial District a loneitute hi Sawhthing (Ginger) ching tura ruat (allocate) an ni.

Thlai thar chhuahte hi Service Providers te'n a hralh chhuah hunah pawh an pui ang a. Hnahthial District tana Service Provider, Future Foods te chuan tun dinhmunah hian thlai thar hralh chhuah theih hun atan India rama Marketing Agencies hrang hrang 51 te nen linkage an neih thu an tarlang a ni.

Thutkhawmnaah hian Pi Julie Zodinpuii, DAO & Member Secretary; Pu HD Lalpekmawia, Project Director, DRDO; Dr. Henry Saplalrinliana, Sr. Scientist& Head, KVK; Pu Lalthakima, DHO; Pi Esther Leihang, SDO Sadar; Pu F. Lalrinfela, DIPRO; Pi Mimi Lalfakawmi, CEO, Future Foods; Pu C. Lalremruata, CEO, Future Foods, Mamit; Pi PC Lalhruaitluangi, CRP, Future Foods, Hnahthial te chu an tel a ni.