3364/2024-2025

2024 Pawltlak thla ni 4: Vawiin khan Lunglei District Bawrhsap Pi Navneet Mann chuan Lunglei - Tlabung kawng, National Highway 302 kawngpui laih zauh leh siam ṭhat hna thawh mek chu a hmunah kal chilhin a enfiah a. Lunglei Additional Deputy Commissioner & CALA Pi Rochuangkimi Khenglawt leh Lunglei Settlement Officer Pu Beitlotha Nohro te'n an ṭawiawm.

NH-302 (Lunglei - Tlabung) kawng siam mek hi NHIDCL (National Highways & Infrastructure Development Corporation Limited) enkawlna hnuaiah contractor BRNIPL (BRN Infrastructure Private Limited) te'n an thawh a ni a. Kawng siam mek enfiahnaah hian Bawrhsap chuan Phairuangkaia lei dawh rawp tawh lutuk chu enfiahin, siam ṭhat ngai laite siam ṭha vat tura contractor-te hrilhin, lei dawh thar hna thawh mek chu a en fiah bawk a. Kawng dung hmun ṭhenkhat, khualzin veivakte'n harsatna an lo tawh ṭhinna hmunte chu siam ṭhat a nih dan a enfiah bakah, kawngpui zauh nana kawng laih tawh leh siam mek hmun ṭhenkhata kawng sira in sate'n kawngpui nek zawnga an sa chu ṭha lo a tih thu sawiin, nakin zelah harsatna la awm thei a nih avangin ṭhiah ngaite ṭhiat a, hma la turin Phairuangkai VC-te chu a chah a. Kawng huam chin atana ROW rin chhunga zangnadawmna la tawh, in la ṭhiat lote enfiah nghal bawkin, kawng siam nana hmanraw hmante a ṭhat tawk leh ṭhat tawk loh endikna Constructions & Project Quality Control Laboratory hmun a tlawh bawk.

Lunglei District Bawrhsap chuan NH-302 Chhumkhum bypass road chu a en bawk a. Tuichawng lei dawh chu motor lian tan zawh tlak leh rinrawla hman tlak a nih tak loh avanga a helna temporary diversion road siam chu a hmunah kalin a enfiah bawk a. Hna thawktute chu chak tak leh ṭha taka thawk tura chahin, hna thawktu leh mipuite'n harsatna hrang hrang an neihte pawh chin fel dan kawng ngaihtuah zel a nih tur thu a sawi a. Kawngpuiin a tan tlang khaw chhung hmun ṭhenkhata kawng laih mek vanga an chenna in bul vela kalna kawng nei ta lote chungchangah kawngpui chhuah chhoh nan step siamsak tura ruahmana siam a nih thu leh a rang lama siam tum a nih thu thuneitute chuan an sawi a ni.

Lunglei Bawrhsap hian Lungsen BDO office leh Tlabung BDO office te a tlawh nghal bawk a ni.

Attachment

  • Loading attachment...