442/2025-2026

Lunglei, 2025 Ṭomir thla ni 2: Vawiin khan Lunglei District Deputy Commissioner Office hma laknaa mipuite'n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) hun chu Bunghmun khua leh a chhehvel mipuite tan Bunghmun BDO Complex-ah buatsaih a ni.

Bunghmuna "I Kawtkaiah Sawrkar" hun buatsaih hawnna hi Bunghmun Block Development Officer (BDO) Dr Lalramdintluanga chuan kaihruaiin, thingtlang khaw kilkhawr zawka chengte'n sawrkar hma lakna hrang hrang an hriat a, awlsam zawka sawrkar office an dawr theihna tura Lunglei DC ruahmanna chu lawmawm a tih thu a sawi a. Bunghmun mipuite ṭanpui tura ke pen chhuak department hrang hrang leh thawktute chungah lawm thu sawiin, mipuite chu an harsatna leh mamawhna zawnah department hrang hrangte dawr hreh lo tur leh an kawtkaia hun remchang buatsaihsak chu chhawr ṭangkai tum ṭheuh turin a chah a. Sub-Deputy Commissioner Pi Lalhlimpuii Pachuau chuan report a pe bawk.

Vawiina Bunghmuna "I Kawtkaiah Sawrkar" tih hun buatsaihah hian office hrang hrang - Deputy Commissioner, Election Branch, Agriculture, Horticulture, Animal Husbandry & Veterinary, Women & Child Development (ICDS), Rural Development Block Development Office, FCS&CA (Supply), Commerce & Industries, Health & Family Welfare, leh Mizoram Rural Bank te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, income & tribal certificate dil, ration card siam ṭhat, bank account hawn thar, hriselna dinhmun endik & ABHA Card siam, ran entir leh ui a hri (anti rabies vaccine) pek, thei leh thlai chi sem, sawrkar scheme hrang hrang inhrilhfiah leh inziah luh leh mipuiin harsatna an thlenna hun te buatsaih a ni.

I Kawtkaiah Sawrkar programme hi January ni 14, 2025 khan bul ṭan a ni a. Haulawng leh Ralvawngah te buatsaih tawh niin, he'ng khaw pahnih aṭang hian mi 826-in service hrang hrang chhawp chhuahte hi an chhawr ṭangkai tawh a. Tun May thla chhung hian khaw 4 - Bunghmun, Tlabung, Lungsen leh Bualteah te buatsaih chhunzawm tura ruahman a ni.