1881/2026-2027

Lunglei, 2026 Thlazing ni 20: Lunglei District chhunga VC02008–Bunghmun Village Council (VC)-a reserve seat ruak pakhat leh Lunglei Municipal Council (LMC) huam chhunga I/2–Zotlang Local Council (LC)-a general seat ruak pakhat hnawh khah tur atan vawiin khan by-election buatsaih niin, mipuite'n zing dar 7 aṭangin boruak muanawm tak hnuaiah tluang takin vote an thlak.

Bunghmun VC-ah candidate pahnih – Cecilia Saidengpuii Sailo, Mizo National Front (MNF) leh B. Lallawmkimi, Zoram People's Movement (ZPM) te awmin, tlai dar 4 thleng khan vote awm zat 794 (mipa 384 leh hmeichhia 410) aṭangin vote 570 (71.79%) a tla tawh a. Zotlang LC-ah candidate pahnih – R. Lalliantluanga, Indian National Congress (INC) leh R. Lalrampana, ZPM te awmin, tlai dar 4 thleng khan vote awm zat 1,935 (mipa 913 leh hmeichhia 1,022) aṭangin vote 1,044 (53.95%) a tla tawh bawk.

Bunghmun VC leh Zotlang LC-ah te hian hun laklawha member boral an awm avangin State Election Commission (SEC) thu chhuak angin by-election hi buatsaih a ni a. Bunghmun VC-ah hian polling station pahnih – Bunghmun West leh Tleu te awmin, Zotlang LC-ah polling station pahnih – Zotlang-I leh Zotlang-II a awm.

Inthlannaa vote tlate hi vote thlak zawh hun tiam, tlai dar 5 hnuah tih tur ṭulte tihfel a nih hnuah polling station hmunah Returning Officer (RO)-te kaihhruaina hnuaiah chhiar zui nghal a ni ang.