1880/2026-2027

Kolasib, 20th August, 2026: Vawiin khan Government of India, Press Information Bureau (PIB), Ministry of Information & Broadcasting, Aizawl, Mizoram buatsaihin Kolasib-ah thalaite leh mipuite tana inzirtirna hun pawimawh, Media workshop 'Varta' chu hman a ni. He hun hi Kolasib Bawrhsap Pu H. Dolianbuaia chuan Khuallian  niin a hmanpui a, MJA Kolasib member-te, DIET student-te leh sawmbik mi pawimawh dangte an tel a ni.

Inaugural Session-ah hian Pu Dr. Rajeev Lourembam, Head of Office, PIB Aizawl hnen atangin inlawmna leh thupui thlirlawkna ngaihthlak a ni a. Khuallian Pu H. Dolianbuaia chuan thu sawiin, India ramin thalaite tihchak leh thuam chak (youth empowerment) a ngaih pawimawh chhan hrang hrangte a sawifiah a. "Viksit Bharat 2047 hmachhawp puitling tur hian kalkhawm thalaite hi India ram hmalam hun in ni a, chuvangin sawrkar pawhin hma a lakpui nasa che u a ni," a ti.

Sawrkar chuan thalaite chu an theihna haichhuaka, kawng hrang hranga rintlak leh puitling (develop) an nih theih nan training hrang hrang buatsaihsakin chher hriam a tum thu a sawi a. Heng sawrkar hmalaknate hi hmang tangkai a, thalaite chu zuau  mai lova, hringnun harsatnate hmachhawn ngam turin a chah bawk.

He hunah hian Khualzahawm, Pu C. Zomuanpuia, President, MJA Kolasib pawhin thu sawiin, hetiang hun tangkai tak buatsaih a ni chu lawmawm a tih thu a sawi. Khawtlang inrelbawlnaah media pawimawhna hrang hrang tarlangin, "Tunlaiah thu thehdarh a awlsam tawh avangin thu dik lo leh dawt lengvak a tam tawh hle a, chuvangin thuthang kan dawn reng rengte a dik leh dik lo kan chhui chian hmasak zel a tul a ni," a ti. Information leh media kalhmang dik taka a than chhoh theih nan leh, tangkai taka hman thiam a nih theih nana inzirtirna (awareness) kawnga tan lak a ngaih thu a sawi bawk.

Special Invitee, Pu David A. Lalhmingchhuana, District Information & Public Relations Officer (DIPRO), Kolasib pawhin Technical Session-I ah  "Nasha Mukt Bharat Abhiyan" tih thupui hmangin zirtirna a pe zui nghal a. Ruihhlo chu a tlem emaw a tam emaw, a tehna (quantity) eng pawh ni se sawrkar dan phal loh a nih miau avangin kawl loh tur a ni tih a sawifiah a. Thalai kalkhawmte chu anmahni ngei ruihhlo laka fihlim tur leh, an thiante pawh ruihhlo ti lo tura fuihtu leh puitu ni theuh turin a sawm a ni.

Technical Session-II ah hian Pu Hnamhlunchhunga, Chief Executive Officer, Mizoram KVI Board chuan "PM Employment Generation Programme" (PMEGP) chungchang, he scheme hnuaia theihna awmte leh mipuite hamthatna tur theih dante tarlangin sawifiahna a nei bawk.