Pu Joseph Lalhimpuia chuan zirlai pass tharte fuihin tum mumal nei a, chhungkua, khawtlang leh ram tana chhawr tlak nih tum turin a chah. Chhim lam atangin Central Service officer leh hna lian tak tak thawk mi engemawzat an lo chhuak tawh thin a, an pension hnuah an hmun ruak luah tur an tlem ta hle, tiin tan lak thar a ngaihzia a sawi a. Mizoram chhungah kum tin Mizo thalai 3000 chuang graduate thar awm ziah ang an ni a, state sawrkar hnuaia hna awm te hian a daih seng lo tih hriain eng kawngin nge ei an zawn ang a, eng kawng nge an zawh dawn tih ngaihtuah chunga rilru nei taka lehkha zir turin a chah a. UPSC leh MPSC bakah Govt. of India hnuaia hna thawh tur tam tak awm te ngaihven tur leh, Mizoram tana an tangkai theihna tur thlir chunga thahnemngai lehzual turin Parliamentary Secretary chuan a fuih a ni.