1270/2026-2027

Lunglei, 2026 Vawkhniahzawn thla ni 2: Vawiin khan Lunglei DC Conference Hall-ah Rashtriya Gram Swaraj Abhiyan (RGSA) hnuai aṭangin Lunglei District chhunga Village Council (VC) 21 te hnenah Computer Set leh Printer sem a ni a. Lunglei District Bawrhsap Pi Navneet Mann chuan a dawngtute kutah a hlan.

Khuallian Pi Navneet Mann chuan VC-te chu mipui rorelna bulṭhut an nih angin sawrkarin an tha tichak turin ruahmanna hrang hrang a siam tih sawiin, VC hna thawh hrang hrang chu khawl nena thlun zawm, chhinchhiah leh theh luh ngai a nih ṭhin avangin RGSA hnuaia computer set sem chu VC-te tana ṭangkai leh awlsamna a nih tur thu a sawi a. Computer an dawnte chu uluk leh ṭha taka enkawl tur te, VC hna atan bakah khawtlang mipuite tan ṭangkai taka hmang turin VC-te chu a chah.

RGSA hnuaia Computer Set sem inkhawm hi Lunglei District Local Administration Officer Pu Beitlotha Nohro chuan kaihruaiin, Computer Set an dawnte chu fel taka chhinchhiah a, uluk taka enkawl turin VC-te a chah a. District Bawrhsap kaihhruaina hnuaiah District Transformation Programme (DTP) kal tlangin thingtlang hmun hla zawka VC-te'n mahni awm hmun aṭanga mobile phone-a office an dawr zung zung theihna tur Smart VC App duan mek a nih thu leh rei lo teah hman theiha peih fel beisei a nih thu a sawi.

Local Administration Officer Pu Benson Marakhai chuan report pein, RGSA hma lakna tlangpui a sawi fiah a. RGSA hnuaia Computer Set sem chu kum 2017–2018 aṭanga kalpui ṭan a nih thu leh Lunglei District-a Village Council 67 hnenah sem chhuah a nih tawh thu sawiin, tun ṭuma Village Council 21 hnena sem tur nen hian VC 88-ah pek a nih tak thu a sawi a. December 2025 aṭang khan Lungleiah District Panchayat Resource Centre (DPRC) hawn thar a nih thu sawiin, VC-te tan computer hman dan zirna leh training hrang hrang chu ṭha taka kalpui chhoh tum a nih thu a sawi bawk.

He hunah hian official-te leh VC ai awhte an tel a. Lunglei DPRC Head Faculty Pi Maria Lallawmkimi'n lawm thu sawiin hun a khar.