746/2025-2026.

Lunglei, 2025 Nikir thla ni 5: India ram puma furpui thlai chin hun (Kharif season) lo thleng tur atana inbuatsaih nana kut hna thawktute an khuaa kal chilh tura feh chhuah runpui, Viksit Krishi Sankalp Abhiyan (VKSA) kalpui mek chu vawiin aṭang khan Lunglei District chhungah pawh kalpui ṭan niin, kut hna thawktu ṭhian department hrang hrang - Agriculture, Horticulture, AH & Veterinary, Krishi Vigyan Kendra (KVK), Soil, Sericulture leh Fisheries official-te chu team thumah insiamin khaw hrang hrangah an feh chhuak.

VKSA Team feh chhuak turte hi Lunglei District Agriculture Office kawt aṭanga chhuakin, vawiin hian khaw paruk - Vanhne, Serte, Sertlangpui, Ṭhuampui, Bualte leh South Lungdai te an tlawh a. He'ng khuaa kut hna thawktu mi 702 (mipa 452 leh hmeichhia 250) te nen hun hmang hovin, an thawh chhuah leh thar chhuah tipung tur leh an thawh chhuah aṭanga hlawkna tam zawk an tel theihna tura tun lai thiamna hrang hrang an hman ṭangkai theih dan tur te, thlai chi ṭha leh lo neih dan ṭha leh sawrkarin kut hna thawktute tana hamṭhatna hrang hrang a duante hman ṭangkai dan tur te an zirtir a. Kut hna thawktute'n an hriat duh hrang hrangte hrilhfiahin, hun hlawk tak hman ho a ni.

VKSA campaign hi May ni 29, 2025 khan India ram pumah kalpui ṭan niin, Lunglei District leh Hnahthial District tana hawnna hun pawh Hnahthialah hman a lo ni tawh a. Mizorama ruah sur nasain inkal pawhnaah harsatna a thlen avanga chawlh lailawk a nih hnuah, khaw awm danin ziaawm lam a pan leh tak avangin kalpui chhunzawm a ni a. Lunglei District chhunga June ni 3 aṭanga kalpui tura ruahman pawh vawiin khan kalpui ṭan theih chauh a ni a. Ruahman lawk dan chuan June ni 12, 2025 thlengin kalpui tur a ni.

Attachment

  • Loading attachment...