745/2025-2026

Aizawl, the 5th June, 2025: Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh, PVSM, AVSM, YSM (Retd) hovin vawiin khan Sikkim, Goa, Telengana leh West Bengal-te, state puitlinga hlankai ni 'Foundation Day' lawmna chu Durbar Hall, Raj Bhavan, Aizawlah neih a ni. 

He hun hmanpuitu Mizoram Larsap, General (Dr) Vijay Kumar Singh (Retd) chuan India rama State leh UT te dinchamphaphak lawmna chu Prime Minister hmalakna, 'Ek Bharat Shreshtha Bharat' hnuaia kalpui a nih thu leh, Raj Bhavan leh Raj Niwas tinahte hetiang programme hi neih thin a nih thu a sawi a. Ek Bharat Shreshtha Bharat programme-ah hian State leh UT hrang hrangte chanchin leh hnam ziarangte pholan thin niin, hnam ziarang leh nunphung danglam tak tak kara inlungrualna leh inunauna tha a awm theih nan buatsaih a ni, a ti bawk.

Mizoram Larsap chuan Sikkim chu state mawi tak, India rama organic state hmasa ber a nih thu leh nauban lak khawma zirchianna 'orchid herbarium' awmna a nih thu a sawi a. Goa chu tuipui kam state mawi tak, khualzinte tlawh nasat leh hmasawn chak tak a nih thu a sawi a. Telengana chu tunhnai leh hmanlai hnam ziarangte mawi leh inrem taka inchawhpawlhna bakah India rama Information Technology hmunpui a nih thu a sawi a. West Bengal chu chanchin ropui tak nei, khawtlang nun siamthat leh zalenna sual kawnga hruaitu pawimawh tam takte lo chhuahna a nih thu a sawi bawk. 

He hun hi Pi Lalhruaitluangi, APS to Governor chuan kaihruaiin programme buatsaih chhan a sawifiah a. Goa Governor Pu P.S. Sreedharan Pillai leh Telengana Governor Pu Jishnu Dev Varma te thuchah bakah state-te chanchin tlangpui tarlanna video thlir ho a ni a. Bipasna Gurung, RIPANS zirlai, Dr. Suman Damera, Department of Public Administration, PUC leh Dr. Anumoy Ghosh, Department of Electronic and Communication Engineering, NIT Mizoram te'n Sikkim, Telengana leh West Bengal state-te chanchin tawi an sawi a. RIPANS, MZU leh Govt. Aizawl North College zirlaite'n cultural items mawi tak tak an entir a. Hemi hnu hian Governor leh Lady Governor te'n hemi puala kalkhawmte hi Upper Lawn, Raj Bhavan-ah kawmin hun hlimawm tak an hmang ho a ni. 

Sikkim hi May ni 16, 1975 khan state puitlinga hlankai niin, Goa hi May ni 30, 1987 khan state puitlinga hlankai a ni a. Telengana hi India rama state naupang ber niin June ni 2, 2014 khan state puitlinga hlankai a ni a, West Bengal hi June ni 20, 1947 khan a lo piang a ni.

Ek Bharat Shreshtha Bharat programme hian India rama State leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Raj Bhavan, Mizoramah Governor kaihhruaiin June, 2023 atang khan buatsaih tan a ni.