695/2024-2025

LUNGLEI; the 6th June, 2024: Vawiin chawhma khan Lunglei District Bawrhsap Pi Ramdinliani, IAS kaihhruaiin DC Conference Hall-ah Lunglei District Child Welfare and Protection Committee thutkhawmna neih a ni.

Pi Ramdinliani chuan naupang kan kaihhruai dan leh enkawl dan bakah khawtlangah mitha leh hmantlak kan chhuah tam lo lutuk hi kan in enfiah a ngai hle a ni, a ti. Nu leh Pa ten an naupan lai atanga enkawlna leh zirtirna tha pek a ngai a, kan fa ten engnge an tuipui tih te kan hriatpui a ngaih thu a sawi bawk.

Thutkhawmnaah hian agenda hrang hrang ngaihtuah a ni a, Sawrkar leh Private Sikul-ah Nodal Teacher for Child Protection ruat tura rel chu District Education Officer in ruahmanna siam tura tih niin District Child Protection Unit in training buatsaih sak tura tih a ni. Dan lova ram chhung leh ram pawn a naupang lakluh leh thawnchhuah chungchangah member  ten ven leh vil kawngah hmalak ni se. Lunglei District Task Force on Child and Adolescent Labour (Prohibition and Regulation) Act, 1986 din chungchang sawihona neih niin he Task Force on Child and Adolescent Labour (Prohibition and Regulation) Act, 1986 hi din a ni tawh tih tarlan a ni. Awareness/Sensitization on POCSO Act, Child Labour, Child Marriage, Child Trafficking, Drug Use, HIV, Tobacco Use chungchangah School leh kohhranah te zirtirna tam zawk pek ni se, Booklet siam a sem tura buatsaih bakah ASHA leh Anganwadi Worker te hman tangkai ni se tih a ni. Home hrang hranga naupang te hriselna endik sak tu tur Doctor, Senior Chief Medical Officer leh Christian Hospital, Serkawn te ruahmanna siam sak tura ngen ni se, Observation Home leh Special Home te tan ruahtui khawlna tur tanky ngaihtuah sak leh Home naupang te tan kut themthiamna lam hmalak sak dan tur te rel a ni. Naupang ruihhlo leh hursualna hmang diklo te tan Child Care Institution din dan tur leh hmalak dan tur rel a ni bawk.

Lungleiah hian Home paruk awmin hmeichhe naupang 49 leh mipa naupang 80,  an vaiin naupang 129 an awm a, Mizoramah  kum 2023 khan POCSO Act hnuaiah case 112, Minor Rape under IPC hnuaiah case 3 leh kum 2024-ah POCSO Act hnuaiah case 12 awm thu tarlan a ni.