694/2024-2025

Dated Siaha, 6th June, 2024 : Vawiin chawhma dar 11 khan Tourism Department bultumin 'Training of Tourist Service Providers and Capacity Building in Siaha' chu DRDO Conference Hall-ah neih a ni a, Pu V.L. Hruaizela Khiangte, District bawrhsap chuan khuallian niin he hun hi a hmanpui.

Pu V.L. Hruaizela Khiangte chuan Siaha district- in  tourism lama hmasawnna rahbi thar a kai theih nana Tourism Department- te hmalakna fakawm a tih thu  sawiin, vawiin program- a tel tura sawmbik ten an ngaihpawimawhna chu lawmawm a tih thu a tarlang hmasa a. Siaha district in khualzinmite tana tlawh chakawm tam tak a nei tih sawiin, a bik takin Mizorama dil lian ber 'Pala Lake' leh Lungmawi (Beino Castle) te chuan tlawhtu a ngah tawh  hle a ti. Mizorama lui lian ber Chhimtuipui pawh Siaha bula awm a ni a, khualzinte tlawh tlaka buatsaih thiam a tul hle a ni a ti . District Bawrhsap chuan  Ni 7, June hian Mara rama tlang sang ber Mawma tlangah 'Ecological Park' hawn a ni dawn a, Siaha district tan Tourism lama hmasawnna thar a thlen ngei a beisei thu a tarlang a. Siaha district chu Myanmar nena ramri nei  anih angin tun dinhmunah kawng tha taka siam mek zel a ni tiin awlsam zawkin Myanmar pawh tlawh theih a ni a, hengte pawh hian Tourism  lam hmasawnna lian tak a thlen mek zel a ni, a ti.

Pu V.L. Hruaizela Khiangte chuan khualzin (Tourist) tamzawk hip turin inkalpawhna kawng tha tak neih a tul hle a ti a. Tun dinhmunah Siaha chu National Highway tha takin a paltlang tawh a, kawng thar siam mek zel ni bawkin, Helicopter service pawh Aizawl atangin  kar khatah vawi li lai a awm tawh a, hei hian khualzinte tan awlsam takin Siaha a thlen thei dawn tiin, khualzin tamzawk ten an hman tangkai ngei a beisei thu a tarlang a. Khualzinte lo dawngsawng thiam turin mipuite pawhin mawhphurhna sang tak an nei tih tarlangin khuallian chuan tawngkam mawi leh inhawng taka awm thiam a tul hle a ti. A bik takin Hotel, Restaurant, Homestay, Chawlhbuk, dawrkai  te pawh mawihnai leh duat taka khualchhawn thin turin a chah a. Taxi, Maxicab  leh Auto Rickshaw driver - te pawh khualzin an phurhten thil theihnghilh  pawh an nei thei a, chutiangah pawh rinawm taka pek let leh thin a tul hle tiin, chu chuan khualzinte rilruah thuk takin thu a sawi ang a, lo zin emaw tlawh leh  duhna liantak a siam thei a ni tiin, hemi kawnga hmasawnna nei turin a ngen a ni.

Khualzinte himna chu thil pawimawh tak pakhat anih thu tarlangin Pu V.L. Hruaizela Khiangte chuan khawtlang hruaituten theihtawp chhuah se a duh thu a sawi a. Khawvel hmun hrang hrangah khualzinte lo suam leh rawk ching an tam hle tih tarlangin khualzinte hian hetianga harsatna an tawhna hmun hi an tlawhnawn  ngai tawh lo  a ti a. Ram ralmuang berte zinga mi kan nih ang ngeiin khualzinte himna hi changvawnah kan neih tlat a tul takzet a ni, a ti . Khualzinte tana ralmuanna leh himna siam turin khawtlang hruaitute leh mipuiten theihtawp kan chhuah zel a tul hle  a ti.

Khuallian chuan Siaha mipuiten khualchhawn kawngah hmasawnna thar neih a tul tiin zin leh tlawh nawn tlaka khualzinmiten min ngaih theih turin rilru i siam thar ang u tiin a sawm a. Tourism in hma a sawn zel nan mimal emaw sawrkar department pakhat chauhin hma a la thei lo a, VC leh  NGO bakah mipui nawlpui nen thawhhona tha tak a awm a tul hle a ti.  Tourism department-te pawh Siahaa 'tourist place'  awmte tun aia nasa zawka zirchiang tur leh a tul anga tihhmasawn kawngah tan la thar turin a sawm nghal bawk.

Vawiin training programme hi Pi C. Ramsangzuali, Tourist Officer, chuan a kaihruaiin, Thutiam (Pledge) sawihona neih niin chawhnu lamah  Resource person pahnih ten  training an neihpui nghal a. 'Host Community ten mikhual lo dawnsawn dan/khualchhawn dan'  tih thupui hmangin Pi K. Lallawmzuali, Proprietor, Riahrun Tours & Travels,  chuan zirtirna a pe a, Pu Vanlalliana, Proprietor EDERNO Tours, chuan 'Tourism Industry- Eizawnna tling ' tih thupui hmangin zirtirna a pe bawk a, zawhna leh chhanna hun hman nghal niin, kalkhawmten an hlawkpui hle a ni.