No.3110/2020-2020

Vawiin khan DC’s Conference Hall, Lunglei ah Pu R. Vanrengpuia, Addl. Deputy Commissioner, Lunglei kaihhruaiin District Consultative Committee/District Level Review Committee/District Level Security Committee Quarter Ended December 2019 leh March 2020 meeting neih a ni. Meeting ah hian District Lead Bank, NABARD, Bank hrang hrang manager-te leh Line Department hrang hrang aiawh te an tel ani.

Pu R. Vanrengpuia chuan Bank-te chu ram hmasawnna hnathawktu pawimawh tak an nih thu sawiin Bank manager kalkhawmte chu an Bank hmalakna apiangah mipui hmasawnna leh an hamthatna dah pawimawh hmasa ber thin turin a chah a. Kawng hrang hranga Lunglei District ti hmasawn turin Bank leh line Department tangkawp ten theihtawp chhuaha hma an lak a tul takzet a ni tiin Bank Manager leh Line Department hotu kal khawmte chu sawrkar scheme-te thahnemngai taka kalpui tur leh uluk taka vil reng turin a chah a.

Lead  Bank Office, State Bank of India, Lunglei District buatsaih Lunglei District Annual Credit Plan 2020-2021 chu tlangzarhna a nei nghal bawk a ni.

He meeting a pharh, December 2019 leh March 2020 quarter tawp a Lunglei District chhunga bank hrang hrang te hmalakna tlangpui chu hetiang hi a ni.

Bank hrang hrang ten Bank Security an neih bakah CCTV, Fire Extinguisher, Alarm System leh Police patrol log book te dahin an enkawl that thu tarlan a ni a. Lunglei Police te nen hemi kawnga thawhhona tha tak an neih thu tarlan a ni. Currency Management- Remittance issues ah pawh harsatna a awm loh thu sawi a ni bawk.

Women Self Helf Group World Vision leh MZSRLM-te pawhin hrileng avangin hma an lak chaklo thu an sawi bawk. Financial year pumpui (01/04/2019 atanga 31/03/2020) chhungin SHG 106 hnenah loan cheng nuai 98 pek chhuah a ni.

Credit Deposit Ratio (CD Ratio – Bank in Deposit a dawn atanga loan a pekchhuah zat) chu December 2019 Quarter ah 46.64% niin March 2020 quarter ah CD Ratio chu 53.22% a ni thung.

Prime Ministers Employment Generation Programme - PMEGP ah hmalakna a tha thawkhat a, Financial year pumpui (01/04/2019 atanga 31/03/2020) chhungin mi 275 hnenah bank hrang hrang ten loan cheng nuai 583.96 an pe chhuak a ni.

Financial year pumpui (01/04/2019 atanga 31/03/2020) chhung hian kuthnathawktu mi 3078 hnenah Agriculture Loan cheng nuai 2472.71 an pe chhuak bawk.

Financial year pumpui (01/04/2019 atanga 31/03/2020) chhung hian sumdawng mi 1957 hnenah MSME Loan (Manufacturing leh Services) cheng nuai 5866.23 an pe chhuak a ni.

Hemi hun chhung (01/04/2019 atanga 31/03/2020) vek hian mi 11 hnenah Education Loan cheng nuai 61 an pe chhuak bawk a. Tin, chhungkaw 1803 hnenah Housing Loan cheng nuai 13,616.34 pek chhuah a ni.

Sawrkar laipui hmalakna khawpuia chengte in sak tanpuina Pradhan Mantri Awas Yojana hnuaia Housing Loan chu Bank thenkhatin an tih that viau laiin Bank thenkhat te chu tan an lak a tul thu tarlan a ni a. Financial year pumpui (01/04/2019 atanga 31/03/2020) hun chhung hian chhungkaw 133 hnenah PMAY Loan cheng nuai 555.93 pek chhuah a ni. Khawpui a mirethei te emaw mirethei pawlte hnen a anmahni eizawnna leh sumdawnna tenau an din theihna tur Loan Self-Employment Programme (SEP) under NULM scheme hnuaiah mi/pawl 100 hnenah cheng nuai 258.27 pek chhuah a ni bawk.

A chunga loan tarlan te khi Lunglei District huam chhunga Bank 19- SBI Lunglei, SBI Chanmari, SBI Tlabung, SBI AOC Square, AXIS Bank, Canara Bank, HDFC Bank, IDBI Bank, Syndicate Bank, United Bank of India, MRB Buarpui, MRB Bunghmun, MRB Haulawng, MRB Lunglawn, MRB Lunglei, MRB Lungsen, MRB Serkawn, MCAB Zobawk leh MCAB Lunglei te pek chhuah a ni.