No.4375/2021-2022

Aizawl the 23rd March, 2022 : Vawiin khan DC Conference Hall, Lunglei ah Pu Kulothungan A, IAS, Deputy Commissioner, Lunglei kaihhruaiin District Consultative Committee/District Level Review Committee/District Level Security Committee Quarter Ended December 2021 meeting neih a ni. Meeting ah hian District Lead Bank Manager Pi Lalremsangi, NABARD DDM Pu Evan T Munsong bakah Bank hrang hrang Manager-te leh Line Department hrang hrang aiawh te an tel a ni.

Pu Kulothungan A chuan he hun hmang tura lo tel zawng zawng te a lo lawm a, Bank-te chu ram hmasawnna hnathawktu pawimawh tak an nih thu sawiin Bank Manager kalkhawmte chu an Bank hmalakna apiang ah mipui hmasawnna leh an hamthatna dah pawimawh hmasa ber thin turin a chah a. Kawng hrang hranga Lunglei District ti hmasawn turin Bank leh Line Department tangkawp ten theihtawp chhuaha hma an lak a tul takzet a ni ti. Bank leh loan kalphung mipuite zirtirna Financial Literacy Campaign pawh uar zawka kalpui turin kalkhawmte a chah a ni.

He meeting a pharh December 2021 quarter tawp a Lunglei District chhunga bank hrang hrang te hmalakna tlangpui chu hetiang hi a ni.

Bank hrang hrang ten Bank Security an neih bakah CCTV, Fire Extinguisher, Alarm System leh Police patrol log book te dahin an enkawl that thu tarlan a ni a. Lunglei Police te nen hemi kawnga thawhhona tha tak an neih thu tarlan a ni. Punjab National Bank chuan Bank security guard anla neihloh thu leh hemi chungchang hi bawhzui mek anih thu reporta ni. Lunglei District chhunga Bank awmte Credit Deposit Ratio (CD Ratio – Bank in Deposit a dawn atanga loan a pekchhuah zat) chawhrual chu June 2021 quarter ah 60.84% niin September 2021 quarter ah 60.10% niin December 2021 quarter ah 61.95% a ni. Reserve Bank of India in a CD Ratio a bituk zat chu 60% niin branch thenkhat 60% phalo te pawh tan la tura hriattir an ni.

Agriculture, MSME leh Other Priority Sector te hnenaloan pekchhuah chungchang pawh sawiho niin December 2021 Quarter thleng khan Lunglei District a bank ten Agriculture hnuaiah mi 2007 hnenah loan cheng nuai 2125.35 hu an pe chhuak a, MSME hnuaiah mi 1093 hnenah loan cheng nuai 3839.71 hu an pe chhuak tawh bawk. December 2021 Quarter thleng hian Other Priority Sector hnuaiah mi 2296 hnenah loan nuai 3686.15 hu an pe chhuak a ni. Self Help Group (SHG) 23 hnenah loan cheng nuai 59.69 pe chhuak tawhin Kuthnathawktute tana loan Kisan Credit Card (KCC) ah mi 936 hnenah loan cheng nuai 817.35 an pe bawk.

Prime Minister's Employment Generation Programme (PMEGP) ah December 2021 thleng khan Lunglei District-a bank ten mi 28 hnenah loan cheng nuai 48.48 pe chhuakin NRLM hnuaiah mi 18 hnenah loan cheng nuai 39.69 an pe chhuak bawk.

State Bank of India chuan April thla chhungin Coins Mela buatsaih an tum thu an report bawk a. Thingtlang khua a cheng te tan banking services ruahman sak dan Financial Inclusion Plan chungchang pawh sawiho niin Lunglei District chhungah mi 2000 aia tlem chenna khua 154 a awm tih report niin heng zinga khua 116 te chu bank branch emaw Bank aiawh (Business Correspondent) ten an cover tawh a. A dang khua 38 te pawh tuam chhuak vek thei tura ruahmanna siam turin Bank te chu ngen leh hriattir an ni.

SBI hnuaia din veng/khua hrang hranga Customer Service Point (CSP) ah te chuan mahni Aadhar Card hmangin pawisa a lakchhuah theih tih tarlan bawk niin hei hi mipuiten uar zawka lo hmang tangkai turin an chah a ni.

A chunga loan tarlan te leh hmalakna te khi Lunglei District huam chhunga Bank 20- SBI Lunglei, SBI Chanmari, SBI Tlabung, SBI AOC Square, AXIS Bank, Canara Bank, HDFC Bank, IDBI Bank, Punjab National Bank, MRB Buarpui, MRB Bunghmun, MRB Haulawng, MRB Lunglawn, MRB Lunglei, MRB Lungsen, MRB Serkawn, MRB Tlabung, NESFB, MCAB Zobawk leh MCAB Lunglei te hnuaiah a ni.