No.4374/2021-2022

Aizawl, the 23rd March, 2022: Vawiin khan Serchhip Ramthlun Venga Pu K. Rokima buildingah ni thum awh tur Serchhip Handloom Fair chu khuallian Ru Lalrinsanga, MSCS, Registrar, Cooperative Societies chuan a hawng.

A hawnna inkhawm tawi Pu Lalrinawma Pachuau, Project Manager, MAHCO kaihhruaiah hian Pu Lalrinsanga chuan, Mizote hi Pathianin thiamna leh theihna ropui tak min pea, khawvel huapa neitu bik (patented) kan neihna khawp puan tah thiamna min pe a, kan vannei hle a ni. Tin, puan hi kan hmeichhiaten an mawi pui em em a, puan bih inhmeh lo nu hi an awm lo a ni, a ti. Sawrkar laipuiin PMVDY hmalakna hnuaiah Handloom hi min rinluh sak tawh leh zela, handloom product in hma a sawn zel theih nan he hmalakna hmang hian nasa taka hma kan lak chhoh zel kan beisei a ni a ti bawk. Fair a dawr hawngtute duhsakna hlanin hmasawn zel tuma bei sauh sauh turin a fuih a ni.

Pu Robuanga, DRCS, Administration, MAHCO pawhin thusawiin, Handloom Cooperative Society chu miin eizawnna a hmuhna hmun tha anih bakah thiante khaichhuahna hmun tha anih tel avangin a hlu em em a. Hmasawn zel tumin ruahmanna te pawh kan siam zel bawk a ni. Tun sawrkar kum kal mekah Lunglei ah leh Champhaiah Fair hi neih tawh a ni a, Serchhip hi a hnuhnung ber a ni rih ang tiin sawrkar kum kal meka Fair an neih dan a sawifiah a, Ministry of Textile leh MAHCO tangkawpin an buatsaih a nih thu tarlangin Serchhip Fair ah hian dawr 20 an inhawnga ni 23 - 25 March chhung an buatsaih dawn a, Serchhip mipuite chu Fair tlawha dawr theuh turin a sawm bawk a ni.

A hawnna inkhawm hi Pi C. Zahnuni, Manager, MAHCO chuan lawmthu sawiin a khar a ni.