Phalna neilo a hnamdang sumdawng te chungchang ngaihtuahin vawiin khan Lunglei District Core Team chuan DCSO Office Chamber ah Meeting an nei a. Meeting hi DCSO Dr.Andrew H. Vanlaldika'n a kaihruaia, Lunglei District Core team din a nih hnu-ah harsatna hrang hrang avanga meeting lawk theih a nih loh dan leh he Team hi Lunglei District a hnamdang dan lova sumdawng te chungchang ngaihtuah tura din a nih thu a sawi a ni.

Member Secretary Pu Vanlalliana SDPO chuan nikum lama YMA Sub Hqrs ten dan lova hnamdang sumdawng leh mizo hming hawh a hnamdang sumdawng an dapchhuah Distrcit thuneitute hnena an thehluh chu a hmunah ngei Police lam te pawhin thil awm dan an enfiah tawh thu sawiin, a bak hmalak zuina erawh a la awm lo a ti. Vawiin a meeting ah hian member kalkhawmte chuan, dan lova hnamdang sumdawng te dapchhuahna kawngah YMA te inpekna chu fakawm an tih thu sawiin, nasa zawkin tan la zel se an duh thu leh hemi kawngah hian YMA te hmalakna thlawp a huaisen taka tanho tul an tih thu an sawi bawk a, Mizo tam takin an hming hawh a hnamdang an sumdawn tir chu pawi an tih thu leh hnam tan a him loh zia te pawh uar takin sawilan a ni bawk. District Core Team thukhawm te hian, hetianga dan lova sumdawng te tihtawp tur hian harsatna tam tak a awm thin thu sawi land a ni, a rang thei ang berin hnamdang sumdawng YMA ten an dapchhuah te hi Core Team hian a hmunah ngei kalin enfiah sela, dan bawhchhia diktak te chu hremna an chungah lekkawh ngei nise an ti a ni.

Attachment

  • Loading attachment...