MP Election 2014 vote chhiar ni tur May ni 16, 2014 atana Lunglei District Counting Officials turte chuan May ni 7, 2014 (Nilaini) atang khan DC Conference hall-ah vote chhiar dan tur training neihpui an ni a, vawiin khan Lunglei DC Pu Ashish Madhaorao More, IAS hovin training kharna hun hman a ni.

Counting Officials Training kharna Lunglei Addl DC Pu Lalhmachhuana kaihhruaiah Lunglei DC leh DEO ni bawk Pu Ashish More chuan May ni 16, 2014 (Zirtawp Ni) zing dar 8:00 atangin Saikuti hall-ah vote chhiar a nih tur thu a puang a; Counting Supervisor, Counting Assistant leh icro-Observer te chu zing dar 7:00-ah kim vek turin a hrilh a ni. Counting Hall chhungah dawhkan 14 dah a ni ang a, tumah bengchheng siam lova boruak muanawm tak hnuaia vote chhiar turin a duh thu a sawi bawk a. Election Commission-in a duh angin Election Observer-in a thutchilh dawn a; VVPAT Slip-te chu Polling Agent ten an en duh phawt chuan an en thei dawn a. Counting Officials te chu hmanhmawh lova, fimkhur takin vote chhiar tura hrilhin; Form C leh Ballot Unit a inmil tur a ni a, dik lo a awm a nih chuan a rangthei ang bera ARO hriattir nghal turin DEO Pu Ashish More chuan a hrilh bawk a ni.

Lunglei District Counting Officals hi Addl DC PU Lalhmachhuana leh SDO(S) Pu Vanlalthiana ten ni 3 chhungin training an pe a ni.