Vawiin khan Lunglei DC Conference Hall-ah Lunglei District Development Coordination and Monitoring Committee (DISHA) chu an Chairman Pu C.L. Ruala, MP Lok Sabha kaihhruaina hnuaiah kumin 2018-2019 financial year atan a tawp berna an thukhawm. Co- Chairman Pu Ronald Sapa Tlau, MP, Rajya Sabha, Pu Lawmawma Tochhawng, MLA, Lunglei East Assembly Constituency te an tel. Hemi bakah hian Project Director DRDA leh Lunglei DC charge la mektu Pu K. Lalrohlua leh a kaihhnawih Sawrkar official-te bakah YMA leh  MHIP aiawh  an tel a ni.

Pu C.L. Ruala chuan Lok Sabha MP leh DISHA Chairman kum 10 a nih chhunga Mizoram District hrang hrang DISHA meeting a hun taka neih a ni thin chu lawmawm a tih thu sawiin member-te chungah lawmthu a sawi a. Mizoram chu India ram pum huapa DISHA meeting nei regular ber pathum (3) thlanchhuah zinga tel pha hial in nikum khan Sawrkar Laipuiin Chawimawina a hlan thu a tarlang a. Kalkhawmte chu thingtlang mirethei leh chanhaite chhawmdawl hna thawk an ni tih hre thar leh turin a chahin mahni hnathawhna kawngah sulhnu tha tak hnutchhiah thei tura theihtawp chhuah turin a fuih a. Kum sawm chhung zet tha taka an lo thawhpui tawhnaah member-te chungah lawmthu sawiin inthlahna thu a sawi bawk.  

Meeting ah hian Central sawrkar sum hmanga hmasawnna hnathawh hrang hrangte report pek ani a; a tlangpui chu hetiang hi a ni.

Sawrkar kum kal mek 2018-2019 hun chhungin MGNREGS  hnuai ah Lunglei RD Block ah ni 75, Hnahthial RD Block ah ni 75, Lungsen RD Block ah ni 75 leh Bunghmun RD Bloack ah ni 77 inhlawhna siam tawh niin job card holder te account ah January ni 22 thleng khan Rs.6845.46 lakhs thunluh tawh anih thu tarlan a ni a. Tun thla chhungin ni 14 thawh leh mek niin kuminah ni 100 chhung inhlawhna siam ngei a nih tur thu Lunglei PD Pu K. Lalrohlua chuan a report a. Individual House Hold Latrine hnuai a ekin sak tur zawhfel tawh niin Kawngpui dung ah km 47.41 thing phun a ni. Lunglei District chhungah thingtlang khuaa mirethei te in sak sakna scheme Pradhan Mantri Awas Yojana – Gramin PMAY-G hnuai ah in 865 sa tura ruahmanna siam mek niin hengte zingah hian 376 zawhfel a ni tawh a. Sawrkar Laipui ruahmanna angin Geo-tagging pawh kalpui zel a ni. 

PMGSY hnuaiah kawng siam hna kalpui mek niin tun dinhmunah Tlabung to Diblibagh Road (6.384 kms), Mauzam to Puankhai Road (11.120 kms), Tlabung to Chawilung Road (20.90 kms), Marpara to Laisawral Road (39.71 kms), S. Vanlaiphai to Muallianpui Road (13.50 kms), Bunghmun to Sesawm Road (10.57 kms), Chawngte C to Bejeisora Road (2.20 kms)-te thawh chhunzawm mek an ni a, Serhuan to Lamthai Road (12.00 kms) leh Tuichawng to Matisora Road (4.840 kms), Ugdasury to Kukurdulaya Road (6.180 kms), Mauzam to New Sachan Road (15.46), Thuampui to Lungchem Road (40.90 kms) atan hmanrua leh mamawh dangte lak khawm mek niin hna hi thawh tan thuai a ni ang.

Swachh Bharat Mission (Gramin) hnuaiah Rs. 11,92,92,000/-  sengin mimal ek in Individual House Hold Latrine (IHHL) 9941 sak zawh tawh niin Lunglei District pum ODF a puang turin a enfiah tu ten Verification an kalpui mek tih PHE Department in a tarlang a. Hemi bakah hian bawlhhlawh sawngbawlna Solid Waste Management (SLWM)  hnuaiah khaw 50-ah hmalak tum niin vantlang inthiarna (Community Sanitary Complex) khaw 16 ah siam turin hmalak tum a ni bawk. 

April 2018 - December 2018 chhung in Lunglei District ah Nausen piang hlim thi 33 an awm a, Infant Mortality Rate chu 19/1000 a ni , hemi chhung hian nu nau chunga thihna pahnih a thleng a ni. Malaria vei mi 1036 zingah mi 972 te chu Malaria Pf niin Denque vei mi pathum hmuhchhuah an ni. April 2018- January 2019 chhungin Medical Mobile Unit (MMU) 27 neih a ni. National Tobacco Control Program pawh chak taka kalpui zel niin Anti Tobacco Squad Drive vawi 53 neih a ni. 

ICDS hnuai ah tar pension 5,267 te hnen ah pek an ni a, naupang kum 6 hnuai lam te tan nutrition pek an ni bawk. Anganwadi 143 ah naupang kum 3 hnuailam 3512 leh naupang kum 3 atanga kum 6 inkar 3967 ten an zir mek a ni. Social Welfare Department hnuaia Vocational Training in Tribal Area hnuaiah mipa 28 leh hmeichhia 60 ten training an nei tawh bawk.

Hengte bakah hian vawiin meeting hian Lunglei District chhunga Central sum hmanga hnathawh dang te an sawi hovin, hmalaknaa harsatna tawh thin te, ruahmanna hmachhawp te leh thil dang pawimawh tam tak sawi ho a ni.