No.6655/2020-2021

Vawiin khan Lunglei District Development Coordination and Monitoring Committee (DISHA) chu an Chairman Pu C. Lalrosanga, MP Lok Sabha kaihhruaina hnuaiah Video Conference hmangin thutkhawmna an nei. Meeting ah hian DISHA Co- Chairman Pu K.Vanlalvena MP, Rajya Sabha, Pu V. Lalsangliana, Deputy Commissioner, Lunglei, Pu K. Lalrohlua Project Director DRDA leh a kaihhnawih Sawrkar official-te bakah VC, YMA leh  MHIP aiawh  an tel a ni.

Chairman Pu C. Lalrosanga, MP chuan DISHA chu Central Government scheme pawimawh zawng zawng thlirhona leh zirchianna anih avangin ram hmasawnna atan a pawimawh hle a, Central RD Ministry leh sawrkar hotulu dang te pawhin an ngai pawimawh takzet a ni, a ti a. Lunglei District Department hotute chu Scheme an implement naa harsatna hrang hrang an tawhte leh Central sawrkara thlen sak leh bawhzui tul te DISHA meeting-ah report hreh lo turin a chah a ni. Kan ram ti hmasawn zel turin Sawrkar hnathawkte, tlawmngai pawlte leh khawtlang hruaituten mawhphurhna sang tak kan nei theuh a ni tiin tha thlahlova theihtawp chhuah zel turin kalkhawmte a chah bawk.

Meeting ah hian Central sawrkar sum hmanga hmasawnna hnathawh hrang hrangte report pek ani a; a tlangpui chu hetiang hi a ni.

Sawrkar kum kal ta 2019-20 hun chhung khan MGNREGS hnuai ah ni 100 inhlawhna siam niin fund awm zat cheng nuai 9817.062 atangin cheng nuai 9807.57 hman a ni. FY kal mek 2020-21 ah tun thla November 2020 thleng hian Lunglei District chhunga Block tinah ni 87 inhlawhna siam tawh a ni bawk. Sum cheng nuai 7639.64 lakhs dawn tawh atangin cheng nuai 7639.64 hman tawh niin kumin hian kawng dung 60.85 kms ah thing phun tawh niin Farm Pond target 626 atangin 556 siam tawh a ni. November 2020 thlengin Lunglei DRDA hnuaia Block pali – Bunghmun, Hnahthial, Lunglei leh Lungsen hnuaia Job Card 38,152 atangin Aadhar thlun zawm tawh 35,936 niin hei hi 94.19% niin Bank account thlun zawm pawh kalpui mek a ni. 

Lunglei District chhungah thingtlang khuaa mirethei te in sak sakna scheme Pradhan Mantri Awas Yojana – Gramin PMAY-G hnuai ah 2019-2020 ah beneficiary chhungkaw 343 leh 2020-21 ah beneficiary chhungkaw 1229 thlanchhuah niin in sa tura ruahmanna siam mek a ni.  

Samagra Siksha hnuaiah 2020-21 chhungin Primary School 315 ah zirlai (enrolment) 15,404 leh Middle School 223 ah zirlai (enrolment) 10,604 awmin heng zinga 20758 (79.81%) te hi Aadhar nen thlunzawm tawh a ni. Covid-19 hrileng avanga harsatna tawh mek karah Samagra Siksha, Lunglei District chuan zirtirtute kaltlangin zirlaite hnenah Mid Day Meal buhfai an semchhuak thin a ni. Primary school naupang pakhat tan Rs.250/- zel hisap in naupang 12,113 hnenah leh Middle School naupang pakhat tan Rs. 400/- hisap in naupang 6719 hnah a  thlawnin zirlaibu sem a ni.

Swachh Bharat Mission (Gramin) hnuaiah 2019-2020 chhungin ek in (IHHL) chhe tawh 799 siam that niin ek in thar 249 sak a ni a, vantlang zun in (CSC) 30 siam a ni bawk.Kumin FY ah October 2020 thlengin ek in 1270 sak tawh a ni.

PMGSY hnuaiah hnathawh 64 atangin 14 chu zawh fel tawh a ni bawk a. Khawpui mi harsa te insak tanpuina PMAY-HFA (Urban) hnuaiah Lunglei khawpuiah 2019-2020 khan beneficiary 782 awmin 446 in an sa zo tawh a, 2020-21 hian beneficiary 644 thlanchhuah leh an ni. Lungsen khua ah beneficiary 404 an awm bawk a ni. 

Lunglei District-ah tun dinhmunah District Hospital pakhat, SDH pakhat, CHC pakhat, PHC pakua, Sub Centre 68, Urban Primary Health Centre pahnih leh Sub centre Clinic 24 a awm mek a. Kuminah infant death 23 awm tawhin nu nau chung thi pakhat a awm tawh bawka ni. Mental Health Awareness vawi 13 neih tawh niin National Tobacco Control Programme Awareness Campaign vawi 6 neih a ni bawk. 

Meeting-ah hian PMEGP loan chungchang pawh sawiho niin Chairman chuan Department leh Bank ten thawhhona tha zawk an neih theihna turin tan an lak a tur thu a sawi a. Private bank te pawh PMEPG loan pek chhuah ngai pawimawh turin a chah a. Lunglei District-ah phone connectivity leh internet a that zawk theihnan BSNL aiawh te pawh tan la turin a chah bawk. 

Hengte bakah hian vawiin meeting hian Lunglei District chhunga Central sum hmanga hnathawh dang te sawihovin, hmalaknaa harsatna tawh thin te, ruahmanna hmachhawp te leh thil dang pawimawh tam tak sawi ho a ni.