No.6656/2020-2021 

Vawiin chawhnu khan SAD Conference Hall, MINECO-ah COVID-19 hri leng kara kan hma lawka hunpui lo thleng tur atana Mizoram inbuatsaih dan tur ngaihtuahin thutkhawm a ni a. Health Minister Dr. R.Lalthangliana'n kaihruaiin, Home Minister Pu Lalchamliana, I&PR Minister Pu Lalruatkima, Medical Operational Team Chairman Dr. ZR Thiamsanga leh Chief Secretary bakah Health leh Home department officialte an tel a, Mizoram Kohhran Hruaitute Committee, Jt. NGO Coordination Committee leh Indian Medical Association aiawhte an tel bawk a ni.

Vawiin thukhawm hian kan hma lawka hunpui lo thleng tur Krismas leh Kumthar lawm leh hmuah chungchang ngaihtuahin kum danga hman thin a nih dan leh tunlaia Mizoram COVID-19 dinhmun an khaikhin a, khawvel ram hrang hrang dinhmun thlirin COVID-19 hripui hi thlasikah a thawk na lehzual nia a lan avangin, COVID-19 hri leng lakah nasa lehzuala mitin kan fimkhur a tulin a hria a, mipuite himna a pawimawh ber tih hriain kohhran hote pawh inkhawm, zaikhawm leh ruaitheh bakah mipui punkhawm theihna tur programme huaihawt lo tura ngen nise an ti a. Dawrkaite inhawn dan tur pawh uluk taka sawi ho niin ei leh bar zawnna kawnga harsatna lian zawk a thlen loh nan ruahmanna mumal taka siam tul tih a ni. Heng bakah hian hunpui lo thleng tur chungchanga tih tur leh tih loh tur nia tha te rawtna chi hrang hrang sawi ho a ni a. Uluk taka sawi ho a nih hnu ah Chief Secretary kaihhruai State Executive Committee, State Disaster Management Authority-in sawi hona zul zuiin inkaihhruaina felfai tak a rang thei ang berin duang chhuak se tih a ni.

COVID-19 hri leng darh zel tur ven nan Aizawl khawpui hmun hrang hrangah awlsam zawka in test theihna tur mobile testing centre "kiosk" siam chungchangah a hmunhma ngaihtuahtu Medical Operational Team report ngaihthlak a ni a. Tunah hian  R.Dengthuama Hall, Mualpui leh Bawngkawn South Community Hall-a floor pakhat chu hman theih tura buaipui mek a nih thu tarlan niin, Aizawl chhim lamah hmun laili pakhat chhinchhiah a nih tawh thu leh a neitu leh enkawltu thuneitu sang lamah hman phal dilna siam mek a nih thu tarlan a ni a, Aizawl tlak lamah hetiang hmun tur hi dap mek a nih thu tarlan a ni bawk. Heng kiosks a sample testna man - RT-PCR, TrueNAT leh RAgT hi India ram khawpui hrang hranga an testna rate nen khaikhina mipuite tana phurrit lutuk ni lo a siam nise tih a ni a. Hemi chungchangah hian sawrkar thupek reilote ah tihchhuah tum a ni.

COVID-19 positive zingah ZMC leh CCC ruahman sa a lut lova, mahni insengso veka hmun danga awm duh te tan hetiang hmun tur hi ruahman tha tih a ni a, a tul anga Tourism Department hotute nen hmalak ho tum a ni. Mizoram puma No Tolerance Drive kalpui mek pawh thlirho niin, kan hma lawka hunpui lo thleng tur nen tun aia khauh lehzuala kalpui tha tih a ni bawk.

Tuna Mizoram COVID-19 positive neih mek 495 zingah Aizawl district mi 274, Lawngtlai district mi 79 leh Serchhip district mi 50 an awm thu tarlan a ni a. Positive hmuhchhuah zawng zawng zinga hmuhchhuah tamna ber Aizawl district-ah 2537 hmuhchhuah tawh a nih thu tarlan a ni. A dawttu chu Lunglei district - 313. Kolasib district - 268, Lawngtlai district - 200 leh Serchhip district - 142 te an ni.

Vawiin meetingah hian DCH/DCHC/CCC 62 Mizorama neih mek ah khum 2573 leh ICU khum 42 a awm thu tarlan niin, report hnuhnung berah khum 2118 leh ICU khum 41 a la ruak tih thu report a ni a. Rualbanlote zinga positive enkawlna tur hmun a hranpa a ruahman a tul thu tarlan a ni bawk.