1669/2026-2027

Lunglei, 2026 Thlazing ni 5: Electoral roll en nawn runpui, Special Intensive Revision (SIR) 2026 kalpui mekah Lunglei District Election Officer (DEO) Pi Navneet Mann chuan vawiin khan Lunglei khawpui chhunga hearing nei mekte tlawh kualin, Electoral Registration Officer (ERO) leh Assistant Electoral Registration Officer (AERO)-te'n hearing an kalpui dan a hmunah a enpui.

Lunglei DEO Pi Navneet Mann hi Election Officer Pi Lalhruaitluangi chuan a ṭawiawm a. Bazar Veng Community Hall-a Lunglei West Assembly Constituency hnuaia Bazar-II leh Bazar-IV Polling Station hearing kalpui mek leh Farm Veng Local Council House-a Lunglei East Assembly Constituency hnuaia Farm Veng-I Polling Station hearing kalpui mek chu tlawhin, ERO, AERO, Booth Level Officer (BLO), tlawmngai pawl leh political party ai awhte nen hearing kalpui mek chungchanga thil pawimawh hrang hrang an sawi ho.

DEO Pi Navneet Mann chuan Lunglei District-ah electoral roll dik leh felfai tak a awm theih nan Election official-te, ERO leh AERO-te, BLO, tlawmngai pawl leh political party te'n theih tawp an chhuah tih sawiin, mipuite pawhin hearing chungchangah ṭha taka thuneitute thawhpui turin a chah a. SIR chu hlawhtling taka zawh fel a nih theih nan thawktute leh mipuite ṭha taka thawk ho zel turin a sawm.

Lunglei District-ah hian Assembly Constituency paruk – Lunglei North, Lunglei East, Lunglei West, Lunglei South, Thorang leh West Tuipui te awmin, polling station 181 a awm a. Lunglei District-a Draft Electoral-a hming chuang mi 98,808 aṭangin mi 21,549 chu ERO leh AERO-te hmaah an nihna finfiah turin hearing tura kohna (notice) pek an ni a. Hearing tura kohte hi kum 2005 SIR-a zawmpui nei lo (no mapping) mi 2,261; an inziah dana felhhlel awm (mapping with discrepancies) mi 18,441 leh ERO/AERO-te'n rinhlelhawm leh enfiah ngaia an ruat mi 847 an ni a. August ni 5, 2026 tlai dar 4:00 thlengin he'ng zinga mi 8,064 chu hearing-ah hian an inlan tawh.

SIR 2026 hearing kalpui mekah hian Draft Roll-a chuang hearing tura kohte bakah, July ni 4, 2026-a Draft Roll tihchhuah hnua electoral roll-a inthun thar, inpaih, insawn leh siam ṭhat dilna lutte chu endik nghal a ni bawk a. Inthun thar, inpaih, insawn leh siam ṭhat dilna hun hi August ni 4, 2026 thleng hawn niin, dilna hun hi khar tawh a ni.