1670/2026-2027

New Delhi, the 6th of August, 2026 : Nimin tlai dar 6:00 khan Pu Lalnghinglova Hmar, Minister of State (i/c), Sports & Youth Services, Tourism, LESDE leh Excise & Narcotics leh Pu Jual Oram, Union Minister for Tribal Affairs te chu New Delhi-a Union Minister chenna inah an in kawm a, Tribal Affairs Ministry kaltlanga Mizorama hmalakna awm thei hrang hrangte sawidunin ruahmanna an siam.

Pu Lalnghinglova Hmar chuan Mizoram chu tribal hlang deuhthaw, mihring zaa sawmkua aia tam Scheduled Tribe awmna a nih thu sawiin, Ministry tan pawh ngaihsak leh duat ngai a nih thu Union Minister a hrilh a. "State te leh sum pawh ngah lo tak kan ni a, chutichung chuan midang pen ruala pen kan duh a, hmasawn kan tum. Theihtawp kan chhuah a, kan tlin bak piahlamah Ministry puihna kan mamawh a ni" a ti. Zirna leh sports lama tribal thalaite mamawh ziakin a thlen nghal bawk.

Union Minister chuan Mizoram Minister chu tha taka lo dawngsawngin hun thawl tak a siamsak a. Mizoram sawrkar hmalakna tha tak takte a lo hriat thin thu sawiin, Sports Minister in mamawh a thehluhte pawh tihhlawhtlin dan kawng a zawnpui tur thu a lo hrilh a ni. Mizoram Tourism Minister in festival hrang hrang denchhena zin tura a sawmna chu kumin chhunga tih ngei a tum thu a sawi bawk.

Minister hi Mizoram atangin Pu H. Lalramenga, PS in a tawiawm a ni.