No110/2021-2022 

Lunglei the 12^th April, 2021 - Lunglei District Emergency Action Team on African Swine Fever chu vawiin tlai khan an Chairman Lunglei DC Pu Kulothungan A kaihhruaiin a office chamber-ah an thukhawm. Meeting-ah hian a kaihhnawih sawrkar official-te, BSF hotute leh tlawmngai pawl aiawhte an tel a ni.

Dr George Martin Lalruattluanga, Veterinary Officer Tlabung-in vawiin (12.04.2021) chawhnu dar 1:00 a report a tih chhuahah Lungsena vawk thi tawh zat hi a zavaiin 406 niin vawiin (nimin chawhnu dar 1 atanga vawiin chawhnu dar 1) bika thi chu 14 an ni a. Report hnu hian thih belh engemawzat an awm bawk a ni.

Lunglei District-a vawk hri leng mek hi hmun danga a darh zau zel lohna tura hmalak dan tur vawiin meeting-ah hian sawiho a ni a. Hemi chungchanga khapna thupek hrang hrang tih chhuah tawh te tha taka kenkawh anih theihnan mawhphurna insema sawifiah a ni a. Lungsen khaw luh lam leh chhuah lamah duty indah anih tawh thu report a ni a. Lunglei khawpui thlen hma Sazaikawna Forest Check Gate duty te pawhin vawk tawlh ruk a awm leh awmloh an check a ni. Lungsen a vawk hri leng mek chu Dan lova ram pawn atanga vawk lak luh ruk vanga thleng nia hriat anih thu pawh sawi lan niin hei hi BSF hotute nen sawiho a ni a. Lunglei District a Indo-Bangladesh border-a BSF duty pawh tun aia ngawrh leh zual leh khauh taka kalpui turin Lunglei DC chuan BSF hotute chu a hrilh a. Sub Division administration, VC leh YMA te nen a tul anga hma lo la tlang turin DC chuan a hriattir a ni.

Hetih lai hian Lunglei Electric Vengah tun hnaiah vawk thi engemawzat a awm avangin AH& Vety Department chuan The Prevention & Control of Infectious and Contagious Diseases in Animals Act, 2009 Section 20 behchhanin vawiin atang khan thu leh awm hma chu Electric Veng Lunglei chu Infected Area-ah a puang a. Electric Veng, Lunglei atanga vawk lakchhuah emaw vawk lakluh khap tlat a ni a, vawk thi reng reng paih mai lovin chinai nen thuk taka phum tur a ni a, vawk dam leh damlo hralh emaw talh a, a sa lakchhuah khap tlat a ni a. Electric Veng leh Lunglei hmun dangah te pawh African Swine Fever chungchang inzirtirna Awareness Campaign kalpui tum a ni bawk.

AH&Vety Department ram, Electric Veng ah vawk thi te hi phum an ni a, helai hmun hi burial ground ah ruat niin vawk thi anlo awm belh anih pawhin he burial ground-ah hian phum an ni ang.

Lunglei District-a vawk hri leng mek hi African Swine Fever ani em tih finfiah turin National Institute of High Security Animal Diseases (NIHSAD), Bhopal ah sample test tir mek a ni a. Dr C Neihthangpuii, VO, Epidemiological Centre Khatla chuan 08.04.2021 tlai khan sample hi NIHSAD, Bhopal a thlenpui tawh a, result chhuak thuai tura beisei a ni a. He natna hri leng mek hi la finfiah ni rihlo mahse, Lungsen atanga sample lak preliminary test result atangin African Swine Fever (ASF) anih ngei rinawm anih avangin AH&Vety Department chuan ASF Prevention and Containment National Action Plan angin hma a la nghal a ni.

 Vawk leh ran damlo leh vawk thi rinhlehawm leh vawk tawlh ruk a rang thei ang bera a hnuaia phone number tarlante kaltlanga report turin Lunglei District Emergency Action Team on ASF chuan Lunglei District mipuite a hriattir a ni.

 Lunglei District Rapid Response Team