Kawng hrang hranga Lunglei District hmasawnna tura duan ‘Special Development Initiatives of Lunglei District’ chu vawiin khan Planning & Programme Implementation Department changtu Minister Pu H. Liansailova hovin a Pisa-ah thlir ho a ni. Chief Minister Pu Lal Thanhawla remruatna anga siam, Lunglei District hmasawnna tur atana Special Development Initiative Project Rs 104.77 crore hu chu Prime Minister Office-ah 7th November 2012-a lo thehluh tawh niin vawiina meeting chuan hmalakna kalzel sawihoin Project hrang hrang atana DPR siam tawh thlen chin leh hmalak zel dan tur pawh sawi ho a ni bawk. He meeting-ah hian Pu Joseph Lalhimpuia, Vice Chairman, High Powered Committee, Lunglei; Department thenkhat hotulu leh Planning Department senior officer te an tel a ni.
Special Initiative Development for Lunglei District hi Pu Joseph Lalhimpuia, Vice Chairman, High Powered Committee, Lunglei hmalakna a kalpui niin Sawrkar Laipuia Ministry hrang hrang 16 ten 10 % Gross Budgetary Support (GBS) atanga an lo ngaihtuah atan Concept note siam a ni. Ministry sawm (10) te chuan rawn chhang let tawh in sum rawn pek dan tur an ngaihtuah mek a ni.
Pu Joseph Lalhimpuia hovin 16th May 2013 khan line Department te hmalak dan tur sawihovin Ministry te duhdan anga Project her rem dan tur te sawiin Concept note/ DPR te chu a rang lama a kaihhnawih Ministry-a thehluh dan tur te an sawiho tawh a. Tun dinhmun ah hian Sericulture Department kaltlangin Rs 2.00 crores hu rawn sanction thuai a nih tur thu hriat a ni tawh a. Ministry of Urban Development & Poverty Alleviation-in Lunglei-a Market Building sakna tur an rawn tifel thuai dawn tih hriat a ni tawh bawk. Ministry of Drinking Water and Sanitation; Ministry of Women and Child Development leh Ministry of Agriculture te chuan Mizoram in concept note a thehluh te chu lo en tawhin rang taka sum rawn pek chhuah thuai a nih theih nan DPR rawn thawn thuai turin Mizoram sawrkar a rawn hriattir tawh.
Ministry of Tourism pawhin Sairep Tlang (Lunglei)-a Bio- Eco Tourism dinna tur Rs 5.00 crores project chu priority list ah an dah thu a rawn hriattir bawk. Heng line Department tena DPR an siam chu he meeting-ah hian thlir ho niin a hma thei ang ber a a kaihhnawih Ministry ah thehluh nise tih rel a ni.
