Chief Minister Pu Lal Thanhawla chuan vawiin khan State Legislative Assembly Auditoriumah Rural Information Kiosk Project Kick Off a hawng.

Hawnna thuchah a sawiah Chief Minister chuan Information Technology (IT) lama hmasawnna duhawm tak hawn theih a ni chu a lawmawm hle a, sorkarin IT lama a hmalakna nasa tak lantirtu pakhat a ni a ti a.Mizote hi IT thiamna lamah hma kan sawn chak em em a, hmantlak leh chhawrtlak ni tura thiamna kan neih a pawimawh hmasa ber a ni a ti. Rural Information Kiosk (RIK) hi sorkar langtlang thei nihna tichiang theitu a ni dawn a, mipui ten kan hman tangkai hle a tul dawn a ni a ti a. Sorkar tha good governance awm thei turin langtlang sorkar (transparency) a awm angai a, chumi atan chuan RIK hi a hmanrua tur a ni a, chuvangin a thawktu Village Level Entrpreneur (VLE) te chu taima tak leh tui taka an hna an thawh a pawimawh dawn a ni a ti. A hmangtu tur mipuite chu lo tanpui a, an duhangte lo tih sak zung zung thin tura chah bawkin, anmahni hmang hian an khua theuhte chu nasa takin hma an sawn thei dawn a ni a ti.

Chief Minister chuan sorkarin IT hi tangkai taka hman a duh avangin hemi atana project pawimawh tak SWAN (state wide area network) pawh nikum 2012 june ni 19 a hawn a nih tawh thu a sawi a.He hi Taxation department chuan online hmangin chhiah tam zawk a lalut mek a, revenue collection pawh a pun phah hle a ni a ti.Online hmanga tax pek theihna turin Transport department pawhin hma ala mek a ni a ti a. RIK project hmang hian hmun kilkhawr ber atang pawhin mipui ten sorkar an dawr thei dawn a, chuvangin service tam zawk nei turin e-district leh SSDG kalpui mek anih thu a sawi bawk.

Khualzahawm Pu Zodintluanga, ICT Minister chuan RIK hawn theih ani chu sorkar thil tum manifesto tihpuitlinna pakhat a ni a ti a. Sorkarin Software Technology Park siam a tum meknaah tunah hian Mizoram University Campus dah tura ruahman anih thu a sawi a. Office lailawkna turin Ch.Chhunga Bus Terminal building hman tum mek a ni a ti.IT lama sorkar hmalakna tam tak a sawi a, Powergrid Corporation of India in Ramrikawna an office thleng Optic Fibre Cable an thlunzawm tawh thu leh chumi hmang chuan service provider BSNL, Airtel leh a dang ten mipui an chawm mek a ni a ti. VLE ten KIOSk chu eizawnna mai bakah mipui ten tangkai taka an hman theihna tura tan la thar reng turin a fuih bawk a ni.

Public Private Partnership (PPP) hmanga kalpui RIK hi Mizoram hmun kilkhawr ber atang pawha sorkar an dawr theihna tura hmanrua pawimawh tak a ni a. Khaw 300 a din turah hian hian khaw 153 atan RIK operator tur VLE lak an ni tawh a. Khaw kilkhawr taka cheng ten an duh zawng leh mamawhte la tura hmunpui, district capital emaw Aizawl emawa kal kher ngai tawh loin RIK-VLE te kaltlang hian an kawtchhuah maiah sorkar an dawr thei dawn a ni. RIK atanga service pekchhuah theih turte chu Tribal, Residential,Birth, Income, Tax Exemtion Certificate te, Revenue Tax, Air leh Train ticket, photo printing, passport size thlalak, internet,scanning, printing leh a dang engemawzah an ni. He project enkawl tur hian ZENICS chu ruat a ni.

VLE te hmanrua tur chi hrang hrang Personal Computer, photo printer, digital camera,multi function device, UPS 1kva, VSAT Internet bandwidth leh solar energy pe thei khawl te hi a hming (token) in Chief Minister Pu Lal Thanhawla chuan district tin aiawha mi pakhat zel hnenah a hlan nghal bawk a ni.