Vawiin khan NLUP Nodal Minister Pu H.Liansailova hovin a office chamber ah Bamboo Development Master Plan siam dan tur chungchang sawi ho a ni a. Industries Minister Pu S.Hiato leh a hnuaia officer te, Environment & Forest Minster Pu H.Rohluna leh a hnuaia officer te bakah NLUP Implementing Board hotu te an tel a ni.

Mizoram-in forest resource a neih zinga tam ber, mau hmanga ram hmasawnna chak taka kalpui turin vawiina NLUP Nodal Minister hova thukhawm chuan hun kal tawha hmalakna te thlir letin hmasawnna tur kawng hrang hrang an sawi ho va. Mizoram State Bamboo Policy 2002 chu en nawn leh siam that ngai an ti a. NLUP hnuaia mau chin dan pawh awmze nei zawka kalpui dan tur sawi ho a ni. Mau atanga Mizoram in a nih dan tur anga revenue tam zawk a lakluh theihna tur te;  mau hmanga thilsiamna industry leh sumdawnna in hma a sawn theih nan leh mau hmanga mirethei ten eizawnna ngelnghet an neih theih na turin bamboo policy lian tham tak kalpui turin ‘road map’ siam a ni dawn a ni.