The Savation Army India Eastern Territory Officer Training College, Aizawl Mualpui Veng ami chu vawiin khan Chief Minister Pu Lal Thanhawla chuan a hawng.

Hawnna thu a sawiah Chief Minister chuan Salvation Army in Mizoram tan mai nilo, India rampum tana Pathian thu zirna Officer Training College an din chu a lawmawm hle a ni a ti a, Pathian ram a zau zel nan Pathianin mal a sawm ngei ang a ti a. He huna tel tura duhsak taka an sawmnaah lawmthu a sawi bawk.

Chief Minister chuan Mizte hi Pathian vohbik kan ni ngeia a rin thu sawiin, khawvela sakhaw lian ber ber pathumin min hual chungin chanchintha hmangin Pathianin min zawng chhuak a. India rama awmin A chanchintha hril turin min ti a, India laka inlakhran kan tumna pawh min hlawhchham tir phal a ni a ti. Tunah chuan India ram chhung mai piahlamah Chanchintha hrilin khawvel ram dang tam takah kan luang chhuak mek a ni a ti. Chuvangin midangte tana malsawmna ni zel turin kan khawtlang nun leh kohhran nun hi kan vawn thianghlim a tul a ni a ti a. Ringtu kan nih angin ei leh barah te, sum leh paiah te kan intodelh tur a ni a. Chutiang ni thei tur chuan rinawmna, dikna, taimakna leh Pathian tihna nung kan neih a pawimawh hmasa a ni a ti.

Hnam zahawm leh changkang kan nih theihna turin sorkar ang pawhin theihtawp kan chhuah reng a ni Pu Hawla chuan a ti a. Mitinin mawhphurhna kan neih hi a inchen vek a, hmasawn turin kan tanrual a pawimawh ber a ni a ti. Chuvangin Pathianin ram zimte min pek hi A duhdan anga cheibawl hi kan tih tur dik tak a ni a ti. Chief Minister chuan Salvation Army in hetiang training college tha tak an din thei hi an mahni zir vang anih a rin thu sawiin, ramdang te pawhin tanpui chakna an neihte hian a tilang a ni a ti.

Mizoramah Salvation Army India Eastern Territory hian kum 1941 khan Officer Training College an lo din tawh a. Tuna training college hawn tak hi a lungphum kum 2008 July ni 30 khan phum alo ni tawh a. A sakna senso zawng zawng hi USA Eastern Territory te leh Switzerland, Hungary leh Austria Territory te rawn thawhkhawm atanga sak a ni a, a vaiin Rs.3,60,54,022/-(Cheng vaibelchhe thum nuai sawmruk singa sangli leh sawmhnih pahnih)sen a ni. He OTC thar hi a hmingah ‘Centennial Meadows” tih vuah a ni a. Naktuk hian he college thara zir tur cadet 24 te Col.Lalngaihawmi’n a lawmlut ang.

Chief Ministeer hi a nupui Pi Lal Riliani bakah Parliamtary Secretaries Pu K.S.Thanga, Lt Col (Rtd) Z.S.Zuala leh Pu Lalrobiaka, MLA ten an tawiawm a ni.