Nimin leh vawiin ruahsur leh thli tleh chuan Lunglei District hmun hrang hrangah harsatna thlenin - in chhia, kawngpui min, leimin in kawngpui a hnawhte leh luilian in chenna hmunhma a chim mek te a awm nual a ni.

Lungleiah hian nimin zing khan Kikawn Lungchhengaw bula Chawngfianga Memorial School (CMS) compound chhak kawngpui chu a min a, helaia footpath hi a tihchhiat nasat bakah kawngpui pawh a min hek nasa hle a, a min lai chu silpaulin a khuh niin YMA an hnathlang a. Leimin in kawngpui a tih chhiat avangin helai hmunah hian barricade dah a ni . Zohnuai vengah lei tlahniam leh lei khi avangin chhungkaw pathum an chenna in atangin an in thiar chhuak tawh a. Zobawk S ah leimin avangin chhugkaw pakhat an in thiar chhuak tawh bawk. Electric Veng, SAI Extension bulah nizan dar 9 vel khan leimin in transformer a delh chhia a, electric ban pathum a tlu bawk a, veng engemawzat ah power supply a awm mumal theilo a, P&E Department ten siamthat hna an thawk mek a ni.

World Bank Road kawnga Ramlaitui khaw chhungah leimin nasa tak thlengin tun dinhmunah motor te tlan tlang thei turin PWD-ten an thianfai tawh a. Haulawng leh Tlawng inkar ah pawh leimin avangin kawng a min phui vek a, thenfai hna thawh mek a ni. Tarabonia-ah in 19 evacuate tawh niin Marpara South ah pawh chhungkaw engemawzat an in thiar chhuak tawh a, VCP atangin report kimchang ngaihchan mek a ni. Bunghmun ah kilometer khat a thui lei khi a awm avangin chhungkaw 12 an in thiar chhuak tawh a. Leimin avangin Zawlpui khua ah chhungkaw 30 leh Phairuang khua ah chhungkaw 3 an in thiar chhuak tawh bawk.

Tlabung Tuipui pawhin len lam a pan zel a, tun dinhmunah Tlabungah chhungkaw 83, Serhuan ah chhungkaw 105, Tipperaghat ah chhungkaw 100, Bindasora ah chhungkaw 20 leh Diblibagh ah chhungkaw 30 an in thiar chhuak tawh a, hmun him lam pan pui an ni. Tlabung SDO (C) Pi V. Lalmuanpuii kaihhruaina hnuaiah Disaster Management Committee ten chhanchhuah hna an thawk mek a, hemi ah hiah All Head of office, Institutions, VC leh YMA-te telin Medical Team, water supply  team, Documentation team leh team dangah te insemdarhin mipuite tanpui hna hi ngawrh takin an thawk mek a ni. Lunglei DC atangin silpaulin leh mamawh dang te thawn vat niin State Disaster Response Force (SDRF) te vawiin tlai khan Tlabung panin an chhuawk bawk a ni.

Indian Meteorological Department in Warning a pek danin ruah hi naktuk lamah pawh la tla chhunzawm tur a nih hmel a. Hei vang hian Lunglei DC Dr Ankita Chakravarty chuan mipuite chu chhuak vak rihlo tur leh an in leh a chhehvel uluk taka lo vil turin a chah a. A tul hun apiangah Disaster Operation Centre No. 0372-2323635, 9436157750 (SDC i/c DMR) leh 9862653478 (DO, DMR) ah te engtik lai pawhin an phone theih a ni. District Disaster Management Authority chu a tulna a pianga che chhuak tura an inralrin reng thu a puang a ni. Thli leh ruah avanga Lunglei hmun hrang hranga leimin, mimal leh vantlang thil tihchhiat te hi Lunglei Bawrhsap chuan a hnuaia officer te tir chhuakin a enfiah tir tawh a ni.

Attachment

  • Loading attachment...