Lunglei District Intensified Diarrhoea Control Fortnight(IDCF) Committee chu vawiin khan Addl DC Pu H.Lianzela hovin ama office chamber-ah an thukhawm a, nikum lama an hnathawh dan thlirletin kumin 27th July-8th August 2015 chhunga he Fortnight hman leh dan turte an rel.

Nikum 2014 khan 28th July-2nd August leh 4th-8th August chhung khan he programme hi ngawr taka kalpui a ni tawh a. Health Department hnuaia PHC/CHC/SDH Medical officer zawng zawng te tan hemi chungchangah workshop leh training hrang hrang neihpui a ni a; khawchhung hmun remchangah te banner leh poster tarin TV lamah te a lem hmangte pawhin mipuite diarrhoea (santen) laka inven dan chungchang hrilhhriat a ni bawk. School 48-ah zirtirna pein santen laka invendan tur hrilhin, kut fai taka sildan turte zirtir an ni a; heng school-ah te hian poster leh thildangte tar a ni bawk. ASHA Volunteers ten mahni bial chhungah kum 5 hnuai lam naupang an chhinchhiah zawng zawngte chu 13015 an tling a, chung zingah santen vei leh santen laka invenna pek ngai naupang 3426 te chu ORS pek vek a ni. ASHA Volunteers-te hi in tinah lutin santen laka invendan te, nau hnute pekdan dik leh faina kawnga hmalak dan tur chhungkaw tinte an zirtir bawk a ni. ASHA ten chhungkaw tin an tlawh chhuahnaah naupang eitha hmulo(malnourished) 25 hmuhchhuah a ni a, naupang 5 chu an hriselna that tawk loh avangin refer an ni bawk a, chhungkaw 7213-te chu Infant & Young Child Feeding demonstration hmangin zirtirna pek an ni.

Rampumah santen/kawthalo avangin kumtin naupang nuai 1.4 vel boral thin nia chhut a ni a, chuvangin he IDCF Programme kalpui mek hian a tum ber chu naupang kum 5 hnuai lam zingah kawthalo/santen vanga thihna titlem tura beihpui thlak a ni. Kuminah pawh 27th July-8th August chhungin he Fortnight hi hman leh tura ruahman angin, Lunglei District huamchhungah Diarrhoea tihremna turin nasa taka hmalak tum a ni.

Kawthalo/Santen chungchanga mipuite hriattur tulte chu hetiang hi a ni :

1. Naupangin kawthalo/santen a vei a nih tih hriat veleh ORS leh tuiril chi pek a, a dam that hma lo chuan pek tur a ni.

2. Kawthalo/Santen a tawp tawh hnu pawhin Zinc tablet hi ni 14 chhung pek chhunzawm tur a ni.

3. Naute/Naupang in kawthalo a vei a nih pawhin nuin nau hnute pek a bansan tur a ni lo.

4. Tui thianghlim chauh in tir tur a ni a, a ek zawh apiangin fai takin sahbon nen sil tur a ni.

5. Nu leh nausen/naupangte chu rawngbawl hmain an kutte sahbon nen fai taka sil tur a ni a, nausen/naupang chaw hrai hmain nuin a kut fai takin a sil tur a ni bawk.

6. Kawthalo/Santen vei naupangte chu ORS leh Zinc tablets pek tur a ni a, hei hian a tidam hma thei.

7. Nau ek chu rang taka paih/thian fai tur a ni.

8. Zinc leh ORS pek chung pawha nausen/naupang chu damlam a pan loh chuan a rang thei ang berin Health Centre hnai berah kalpui tur a ni.

9. Nausen/Naupang-ah hetianga a lo lan hian rang takin doctor pan tur a ni : kawkhawh, luak vak vak, tuihal, ei/in a duh lo, khawsik leh ek thiin a pawlhin.

10. ASHA leh ANM te engtiklai pawhin rawn theih an ni.