938/2025-2026

Lunglei, 2025 Nikir thla ni 26: Lunglei District Level Committee on Green Mizoram (DLCGM) thu chhuak bawhzuiin Lunglei District Information & Public Relations Office chuan nikum Green Mizoram Day-a an thing phun, Hrangchalkawn leh thaizawl inkar National Highway 54 kawngpui dunga mi chu nimin khan a hmun sam faiin, a nung lote thing tiak thara an thlak bakah, a hungna an siam tha bawk.

DLCGM thu chhuak angin Environment, Forests & Climate Change (EF&CC) Department chuan June ni 13, 2025 khan nikum GMD-a Hrangchalkawn leh thualthu inkar NH-54 kawng dunga thing tiak phunte a nun dan leh a dinhmun an zir chiang a. Lungleia department leh pawl hrang hrang 54 te'n thing tiak 1,170 an phun zingah 687 (58.72%) chauh a nung tawh tih leh a thi leh chhia thlak ngai 483 leh a hungna chhia siam that ngai 301 a awm tih an hmu chhuak a. Thing phun thi leh chhia a tam chhan hi kawng laihna leivung leh chirh tawlh vang te, kawng sir hungna siam hna thawh vang leh ?hal a rei vang te ni deuh bera hriat a ni.

DLCGM chuan thing phuntu department leh pawl hrang hrangte chu an thing phunna hmun sam fai bakah, a thi leh chhiate thlak nana thing tiak phun thar leh a hungna siam that hna te an remchan dan anga thawk turin a ngen a. DLCGM thu chhuak bawhzui hian Lungleia department leh pawl hrang hrangte chuan tun lai hian Lunglawna EF&CC Check Gate-ah thing tiak leh a hungna hmanruate lain, an thing phun enkawl zui hna hi an thawk chho mek a ni.