1912/2022-2023
Lunglei the 14th September, 2022 - Lunglei District huamchhunga Myanmar raltlante chungchanga District level-a thuneitu District Level Committee on Myanmar Refugees chu nimin khan an Chairman Lunglei DC Pu Kulothungan A kaihhruaiin an thukhawm.

Mizoram District pali – Hnahthial, Lunglei, Lawngtlai leh Siaha –a Myanmar raltlan awm mek te mamawh hrang hrang ruahman sak tura hma la mektu NGO- Adventist Development & Relief Agency India (ADRA) leh Mizorama an thawhpui (local implementing partner) Centre for Peace & Development (CPD)-te hmalakna te thlirho a ni.

Pu Kulothungan A chuan NGO hruaitute chu Myanmar raltlante tana an hmalakna hrang hrangte uluk leh fimkhur taka kalpui tura chahin District administration hrilh hre zel tur leh dan leh thupek behchhan tlata hma la turin a chah bawk a ni.

Myanmar raltlante tana tanpuina hi United Nations High Commissioner for Refugees (UNHCR) hnuaia hmalakna niin July ni 1, 2022 atang December ni 31, 2022 thleng kalpui tur a ni a. He project hnuaiah hian raltlante mamawh hrang hrang – ei leh bar (dry food kit), mimal mamawhte (hygiene kits – toothbrush, tooshpaste, soap etc), blanket, bungbel, bedsheet, naupang tan education kit (zirlaibu, pen, pencil, schoolbags etc) etc te pek an nih dawn bakah ratlante awmna camp ah tui connection leh tui dah khawlna tanky te ruahman tum a ni. ADRA leh CPD thawktute Hnahthial, Lunglei, Lawngtlai leh Siaha District huamchhunga raltlan camp-te tlawh chhuak tawhin dry food kit 8000, Hygiene Kit 2500, Dignity Kit (Undergarments, sanitary napkins) 2500 leh Non Food Item Kit (blanket, bungbel, bedsheet etc) 2000 tanpuina sem chhuak turin tun dinhmunah an inpuahchah mek a. Heng District pali a camp 39-ah naupang infiamna hmun (Child Friendly Spaces) 50 siam tawhin naupang 2000 hnenah Educational Kit an pe chhuak dawn bawk a ni.

Deputy Commissioner Office, Lunglei District chhinchhiah danin September ni 12, 2022 thleng khan Lunglei District-ah Myanmar raltlan mi 2112 an awm a. An zinga mi 1062 chu camp chhungah awmin mi 1050 te chu camp pawn lamah an awm a ni. Heng raltlante zinga mi 1123 te chu hmeichhia niin 989 te chu mipa an ni. An zingah naupang kum 18 hnuai lam mi 706 an awm bawk a ni.

Raltlante hi an camp ah leh an awmna hmunah te kal chilhin Covid-19 vaccination pek thin an ni a. An zingah Covid-19 vaccine la thei chin mi 1429 awmin 1st dose mi 721 ten la tawhin 2nd dose mi 429 in an la tawh bawk a ni.

Meeting-ah hian Lunglei SP Pu Rex Zarzoliana Vanchhawng, Additional DC Pu V. Lalruatliana leh official dangte bakah Sub Hqrs YMA, MHIP, Joint VC Association leh Myanmar Refugees Relief Committee Lunglei District hruaitute an tel a ni.