1911/2022-2023
Aizawl 14th September 2022: Vawiin khan India ram State Cooperative Banks hrang hrangte inthlunzawmna pawl National Federation of State Cooperative Banks Ltd (NAFSCOB) chuan Aijal Club-ah Annual General Meeting an nei a. Hawnna inkhawmah I&PR Minister Pu Lalruatkima chu khuallian a ni.

Pu Lalruatkima chuan NAFSCOB hmalakna leh hlawhtlinna hrang hrang te sawiin Mizoram Cooperative Apex Bank kaltlanga Mizoram mipuiin malsawmna an dawn theihna bul pawimawh tak pawh NAFSCOB hmalakna vang a ni, a ti. Cooperative bank sum lakluh atanga interest tax lak thin nuai bo turin NAFSCOB hian Sawrkar Laipui hlawhtling takin a dawr a, NAFSCOB vek hian Cooperative Credit movement in harsatna a tawh te zirchiang tur leh hmarchhak state a hmasawnna hna chak zawka thawh a nih theih nan RACNER (Review and Action Committee on North Eastern Region) an din tih Minister hian a sawi a. Cooperative bank te leh Reserve Bank of India, State Government, Central Government, NABARD te leh financial institution dang te nena inthlunzawmna pawimawh tak a nih avangin NAFSCOB chu Cooperative Bank te hmasawn zelna tur atanga kawng pawimawh ber an ni, a ti. Rampum huap General Meeting pawimawh hlawhtling taka thlengtu Mizoram Cooperative Apex Bank te fakin Minister Pu Lalruatkima chuan ram mipuite dinhmun chawikang tura hma an lakna chu thahnemngai taka chhunzawm zel turin a chah a ni.

NAFSCOB Meeting-ah hian India ram State Cooperative Bank hrang hrang atangin palai 40 an rawn kal a, meeting hian hmalakna an neih mekte bawhzui dan tur leh Cooperative Bank leh Short Term Cooperative Structure tihchakna tura hmalak dan tur chi hrang hrang an rel a ni.

Hawnna inkhawmah hian NAFSCOB Managing Director Pu Bhima Subrahmanyam, NAFSCOB Chairman Pu Konuduru Ravinder Rao leh Mizoram Cooperative Apex Bank Chairman Pi T Lalmuanpuii ten thu an sawi a. MCAB Managing Director leh CEO ni bawk Pu Lalzuahliana’n lawmthu sawiin hun hnung a khar a ni.

NAFSCOB hian Annual General Meeting thlengtu atan Bank dinhmun tha leh hmasawna a ngaih te a ruat thin a. Mizoram Cooperative Apex Bank Ltd pawh hi tunhnai kum 10 chhunga India rama State Cooperative Bank zinga hmasawn ber pakhat a nih avangin he meeting hi thlen tir an ni.

Mizoram Cooperative Apex Bank Ltd hi India ram Cooperative Bank zinga Data Center mahni puala nei tlemte zinga pakhat a nih avang leh hmasawnna hrang hrang a neih avang hian State dang atanga palai rawn kal zingah an hmalak dan a taka hmu duh an tam avangin kum dang aiin meeting ah palai an tam a ni.