5043/2025-2026

Lunglei, 2026 Vau thla ni 30 : Naupang leh ṭhalaite zinga ruihhlo ṭhat lohzia inzirtirna peng khat atan, Lunglei District Level Committee on NCORD leh Nasha Mukt Bharat Abhiyaan hma lakna hnuaiah "Ruihhlo Do" tih thupui hmangin Lunglei Municipal Council (LMC) huam chhunga kohhran hrang hrangte tan Easter Sunday, April ni 5, 2026 khian "Easter Egg Painting Competition" (Easter artui incheisiak) buatsaih a ni dawn.

He intihsiakna hi naupang leh ṭhalaite zinga ruihhlo ṭhat lohzia inzirtirna leh ruihhlo laka fihlim tura infuih tharna atana ruahman niin, kohhran hrang hrang hnenah ngenna lehkha thawn chhuah a ni a. A tel thei kohhrante chuan anmahni remchan dana ruahmanna siamin, kohhran member naupang leh ṭhalaite tan ruihhlo dona lam hawia artui incheisiak leh ruihhlo dona au hla chuanna placard insiamsiak hi an huaihawt ang a. Artui chei sa leh placard thlalakte hi a siamtu hming nen phone number: 9612876031-ah hian WhatsApp kal tlangin Easter Sunday ral hmain theh luh tur a ni ang.

Thalak theh luhte hi April ni 6, 2026-ah endik niin, lawmman ṭha tak siam a ni dawn a. April ni 8, 2026-ah lawmman sem a ni ang.

Lunglei District Bawrhsap chuan he intihsiakna hi Easter Sunday lawmna peng khat a nih bakah, Lunglei mipuite'n ruihhlo tel lova nun hlim leh hrisel an neih theih nana buatsaih a nih thu sawiin, Lunglei khawpui chhunga kohhran hrang hrang naupang leh ṭhalaite chu he intihsiaknaah hian phur taka tel turin a ngen.