2407/2022-2023

Lunglei the 22^nd October, 2022 – Lunglei District Level Screening Committee on Unauthorized Settlement chu nimin khan an Chairman Lunglei DC Pu Kulothungan A kaihhruaiin a office chamber-ah an thukhawm.

Meeting-ah hian dan lova din khua Tuichawngchhuah atanga sawn chhuah chhungkaw 49 te dinhmun leh hmalak tul te ngaihtuah ho a ni. LAD, Rural Development, School Education, EF&CC, Revenue leh Health & FW Department aiawhte bakah Tuichawng khawtlang hruaitute an tel a ni.

Lunglei DLAO Pi PC Zonuntluangi chuan heng chhungkua te dinhmun zirchianga September ni 26 atanga ni 29 chhunga Spot Verification an neih report a pe a. He Spot Verification hi DLAO Pi PC Zonuntluangi in kaihruaiin LAD thawktute bakah Rural Development, School Education, H&FW leh Tuichawng VCP Pu B. Natun Kumar Chakma leh a thawhpuite an tel a. Report a lan danin Dan lova din Tuichawngchhuah khua atanga Tuichawng khua a sawn chhuah chhungkaw 49 zinga chhungkaw 35 chu Tuichawng ah la awmin, chhungkaw dang hi an pem chhuak tawh a ni.

Chhungkaw 17 te hnenah insak tanpuina PMAY(G) pek tawh niin la dawng ve lo chhungkua te chu pek ve ni se tih Committee chuan a rel a. Naupang pasarih school kal lo/drop out awm te pawh enrol leh ngei ni se tih Committee chuan relin School Education department chu mawhphurna pek an ni. Tui leh electric supply an dawn that thu leh Health Department atanga vaccine, DDT Spray, LLIN thosilen te pek an nih tawh thu report a ni bawk. Heng chhungkua-te hi MGNREGS ah Job Card nei vekin Family Ration Card pawh siam sak tawh an ni.