309/2022-2023
Vawiin khan Lunglei District Level Skill Committee chu an Chairman Lunglei DC Pu Kulothungan A hovin Lunglei DC Conference Hall-ah an thukhawm.

Meeting-ah hian Line Department hrang hrang hotute leh District Level Skill Committee hmalakna buaipui tura sawrkar laipui ruat Pu Ajinkya Madaikar (MGNF Fellow) te an tel a ni.

Lunglei District Level Skill Committee Chairman Lunglei DC Pu Kulothungan A chuan thalaiten an thiamna (skills) leh an tui zawng (interest) hmang tangkaia eizawna ngelnghet an neih theihnan training hrang hrang leh hmanrua an mamawh te Skill Committee kaltlang hian kan ngaihven sak dawn a ni tiin Line Department te chu theihtawp chhuah theuh turin a sawm a ni.

District Level Skill Committee-in a tum bulpui ber chu District economy tih hmasawn niin District mipuiten eizawnna ngelnghet an neih theihna tura eng thiam thil nge an mamawh tih zirin District Skill Development Plan an duang dawn a. He District Skill Development Plan kaltlang hian Department hrang hrang tangkawpte chuan mipuite tana chhenfakawm zirtirna leh inkaihhruaina ruahmanin an kalpui thin dawn a ni.

Meeting-ah hian Skill Development lama Line Department-te hmalakna kal mek te leh training an buatsaih thin te report ngaihthlak niin mawhphurhna te insem a ni a.

District Level Skill Committee hnuaia sub-committee pahnih – District Skill Development Plan Sub-committee leh Placement and Entrepreneurship Sub Committee member te in ruat a ni.

Ministry of Skill Development hnuaia SANKALP kaltlanga skill development project thehluh dan tur te pawh sawiho niin May ni 15, 2022 hma ngeiin he project hi sawrkar laipuiah thehluh tum a ni.