308/2022-2023
Kolasib dated 27th April 2022: Vawiin chawhma khan Pu K.Lalrinliana, Minister of State, Food, Civil Supplies & Consumers Affairs Department, Kolasib Assembly Constituency bialtu MLA ni bawk chuan ni thum awh tur ‘M/S Blue Hill Engineering Mizoram Open Chess Tournament 2022’ chu Parish Hall, Venglai, Kolasibah a hawng.

Minister Pu K.Lalrinliana chuan hrisel nan taksa sawizo a pawimawh ang bawkin rilru sawizo a, inelna thianghlim hmanga ngaihtuahna sen tam a pawimawh thu a sawi a, chumi atan chuan Chess chu infiamna tangkai ber pawl a ngaih a nih thu a sawi. Hripui len hnu ah hun rei tak Chess Tournament buatsaih a nih theih loh hnuah Kolasib District Chess Association leh Mizoram Chess Association hmalakna a Mizoram pum huapa Chess inelna buatsaih a ni thei chu lawmawm a tih thu sawiin mizoten Chess-a hma an sawn phah ngei a beisei thu a sawi bawk a ni.

‘M/S Blue Hill Engineering Mizoram Open Chess Tournament 2022’ hawnna hun hi Pu C.Lalremsiama, President, Kolasib District Chess Association in a kaihruaia Pu Clement Lalropuia, Secretary-in report pein Dr.R.Lalthlamuana, Proprietor, M/S Blue Hill Engineering leh Dr.Lalhmuchhuaka, President, Mizoram Chess Association-ten thusawina hun an hmang bawk a ni.
Mizoram Open Chess Tournament 2022-a tel tur hian Mizoram District hrang hrang atangin mi 72 an inziaklut a, lawmman hetiangin siam a ni :
1st Prize - Rs. 40,000 leh Certificate
2nd Prize - Rs. 20,000 leh Certificate
3rd Prize - Rs. 10,000 leh Certificate
te niin heng bakah lawmman chi hrang hrang siam a ni bawk.