No.4720/2020-2021

Lunglei District Task Force on Covid-19 chu vawiin khan an Chairman leh District Bawrhsap ni bawk Pu V. Lalsangliana, IAS kaihhruaiin Lunglei DC Conference Hall-ah an thukhawm a, hmalak tawhna te thlirletin hmalak chhunzawm zel dan tur an sawiho. Meeting-ah hian Lunglei DLTF member-te bakah Chanmari, Ramthar, Venglai, Bazar Veng leh Rahsiveng VLTF hruaitute an tel a ni.

Chairman Pu V.Lalsangliana chuan COVID-19 hri leng vanga inkhuahkhirhna chu mimal eizawnna leh mipuite harsatna sut kian a nih theih nana thlahdul deuh a nih rualin, mipuite tan fimkhur zual sauh a tul thu a sawi a. Covid 19 do kawngah DLTF Lunglei thawhhona leh mipuite thuawihnaah lawmthu a sawi a. Lunglei District-ah Covid-19 positive mi 119 hmuchhuah tawh niin an zinga mi 108 chu CCC atanga chhuak tawhin mi 11 enkawl mek an la awm thu a sawi bawk.

Lunglei SP Pu Stephen Lalrinawma pawhin dan leh thupek kenkawh lama an hmalakna te sawiin Police Flying Squad team hnih an duty reng thu leh zan curfew enforce turin khawpui hmun hrang hrangah police-te tlaivara an duty thin thu a tarlang a. The Mizoram Epidemic (COVID-19) Regulations, 2020 hnuaiadan bawhchhia te pawh fine chawi tir thin niin chung mite pawisa chawi tlingkhawm chu Rs. 5,52,100/- a tlin tawh thu asawi bawk.

Meeting-ah hian Mizoram sawrkarin September thla chhunga Mizorama inkaihhruaina kalpui dan tur thupek 31/08/2020 a tih chhuah chu zirho niin he thupek hi Lunglei District-a kenkawh dan tur sawiho a ni a. Lunglei khawpui chhunga thlai bazar kalpui dan tur leh bazarna hmun tur chungchang ngaihtuah a ni bawk. Mipuiin awlsam zawka thlai leh chawhmeh an hmuh theih nan veng hrang hrang VLTF ten an veng theuhah chawhmeh zawrhna tur hmun an ruahman mek a. Hemi bakah hian Lunglei chhehvel khaw thenawma kuthnathawktuten Lunglei khawpui chhunga an thlai tharte an zawrh ve theihnan Lunglei town area VLTF-te hmalak pui turin ngen ni se tih meeting chuan a rel bawk a ni.