Tunlaia natna leng mek Coronavirus laka lo invenlawkna leh inpuahchah dan ngaihtuah chhunzawm turin vawiin chawhnu khan Lunglei District Task Force on Coronavirus chu Lunglei DC Conference Hall-ah an thukhawm. Task Force meeting vawikhatna 17^th February, 2020-a lo neih tawh thurel te bawhzuina leh hmalakna te thlirlet niin hmachhawpte sawiho a ni. Lunglei Additional DC Pu R.Vanrengpuia’n meeting hi kaihruaiin H&FW Department thawktute bakah Lunglei District Department hrang hrang hotute leh Block tin BDO-te, khawtlang hruaitute leh tlawmngai pawl aiawhte an tel a ni.

Meeting-ah hian Coronavirus natna laka lo inpuahchah lawkna ‘Preparation Plan for Coronavirus Outbreak for Lunglei District’ leh hmalakna kal mek ‘COVID-19 Preparation Report under Lunglei District’ chu Dr Lalrinthangi, SMO Lunglei in sawifiahna hun a hmang a. Lunglei DC hovin February ni 8, 2020 (Saturday) khan Coronavirus chungchangah Emergency Meeting neih niin Task Force member turte ruat an ni a. Tin, India leh Bangladesh ramri depa awm, Kawrpuichhuah Lunglei District-ah 10th February, 2020 (Monday) atang khan Screening hna kalpui turin Medical Team duty tur dah an ni a. 02/03/2020 (Monday) atang khan Missionary Kai leh Licheng Kai ah te screening point hawn belh a ni. Ramri kaltlanga veivak leh khualzinte endik hna hi kalpui mek zel niin tun dinhmunah Lunglei District-ah Coronavirus vei emaw rinhlelh (suspect case) la hmuh an ni lo. District Task Force on Coronavirus in a rel angin Tlabung Sub Divisional Task Force on Coronavirus chu 19^th February, 2020 khan din alo ni tawh bawk a ni.

 Tin, meeting-ah hian school leh College-a zirlaite hnena semchhuah tur thuziak (Leaflet) sem a ni a. Awareness video clip leh radio ah live phone-in programme-te buatsaih ni se tih meeting chuan a rel a. Lunglei District huam chhunga YMA Branch tin chanchinbu ah te inzirtirna tih chhuah tum anih bakah kohhran hrang hrang inkhawm naa puan tur Coronavirus chungchanga hriattur pawimawh buatsaih nghal turin H&FW Department-te mawhphurna pek an ni.  

Lunglei District-ah Coronavirus vei hmuhchhuah lo awm ta se rang taka chet la thei tur ‘Rapid Response Team’ ruat an ni tawh bawk a. Hengte hi Lunglei District SMO leh District Surveillance Officer ni bawk Dr Lalrinthangi, Dr Isak Lallawmkima, MD Specialist, Pi C.Lalzami, District Nursing Superintendent, Pu Lalruatkima, CMO Office leh Medical Mobile Unit Team (6 Nos) te an ni. Coronavirus vei anlo awm anih chuan anmahni dah hranna tur “Isolation Ward” pawh ruahman tawh niin Lunglei District Hospital-ah khum panga (5) leh Tlabung Sub Division Hospital-ah khum pathum (3) ruahman tawh a ni. Isolation Ward-a duty tur te pawh ruat lawk an ni tawh.

He natna laka inven theih nana pawimawhte chu hengte hi a ni:

1. Kan kut fai takin sahbawn hmangin sil thin tur a ni.

2. Kan khuh, hahchhiau in rawmawl/tissue paper in emaw hmui khuh thin tur a ni a. Tissue paper hman hnu kha bawlhhlawh bawm chhin nei ah paih nghal tur a ni.

3. Sa kan sawngbawl zawhah kut fai taka sahbawn hmanga sil leh thin tur a ni.

4. Sa leh artui hmin tha taka siam chauh ei tur a ni

5. Kan kut lawngin Mit, hnar leh Ka khawih loh tur a ni.

 6. Khuh, khawsik leh thawk lama harsatna nei kan awm chuan ISDP Number 8259930355/9612326762/9436195535 ah te engtiklai pawhin inhriattir theih a nih angin inhriattir vat tur a ni e.

Covid-19 avang hian mipui tan chiaina tur a awm lova. Zin veivahna kawng thenkhat khar ni mahse bungraw mamawh phur erawh chu a pangngaiin a kal reng dawn a. Eichawp leh ni tin mamawh dang inchhek khawl lawk a tul lova, bungrua a toa zawrh leh chheprelh phei chu khap tlat a ni.