Vawiin khan Lunglei District Road Safety Committee te chu an Chairman Pu R. Vanrengpuia, Additional DC hovin a pisaah an thukhawm a.  Road Safety Week vawi 31-na ni 16/03/2020 atanga 22/03/2020 inkara lo thleng tur hman dan tur an rel.

Pu R. Vanrengpuia kumin Road Safety Week thupui  atan “Dan Zawm Hi Himna a Ni” tih thu thlan a nih thu sawiin Road Safety Week hlawhtling tak Lunglei District a hman a nih theih nana ruahmanna tha tak siam a tul thute member te hmaah a sawi hmasa a. Chumi hnuah Member Secretary Pi Carolyn LB Khiangte, DTO chuan Mizoram Road Safety Council rorel te leh kum hmasa lama Week kan lo hman tawh dan te sawifiahna a nei a ni.

Committee hian ni 16/03/2020 zing dar 7:30 ah hian a hawnna inkhawm Lunglei Police Station kawtah neih an rel a. Hawnna inkhawm hi urhsun taka hman tum niin sawrkar official-te, Media mite, tlawmngai pawlte leh ZDU leh an hnuaia Driver Association hrang hrang hruaitute an tel ang. Week chhungin lirthei khalhtuten dan an zawm tha em tih uar taka endik ni se, document fel lo leh kum tling lova lirthei khalh chingte phei chu uluk leh zuala endik ni se an ti. Week pual hian a hawn ni 16/03/2020 (Monday) chawhma dar 11-ah Road Safety thutiam (Pledge) chu sawrkar pisa tinah leh zirna inah te sawiho ni se tih Committee chuan a rel a. Tin, College thlanchhuah ah te road Safety chungchang inzirtirna awareness neih a ni bawk ang.  

Heng te bakah hian State Road Safety Council-in Week chhunga hmalakna tur a ngaih pawimawh zualte chu tha taka tih vek tum ni se a ti a, chumi atana mawhphurtu turte pawh vawiin hian siam fel nghal an ni bawk.