Shyama Prasad Mukherji Rurban Mission (SPMRM) hnuaia Maubuang leh Sateeka sawrkar hmalaknate vawiin tlai khan Pu Lalruatkima, Rural Development Minister chuan a tlawh.
Sateekah hian Wholesale Market Centre sakna tur RD Minister hian a en a. Ruahman dan chuan Sateek khawchhunga sak tur he Market Centre hian 448 sqm a awh ang a. Chhawngthum awm tura duan niin lirthei hunna (parking) tha tawk tak a nei ang. A chhungah hian dawr engemawzat bakah restaurant changkang tak dah tel tum a ni bawk. He project thawh nan hian cheng nuai 430 ruahman a ni a, kum khat leh a chanve vel chhunga thawh zawh theih beisei a ni.
Pu Lalruatkima hian Maubuang khua tlawh chhunzawm nghalin nauban hmunpui - Mizoram Orchid Centre sak mek a hmunah a en a. He Orchid Centre hi a ruhrel din fel tawh niin Laboratory leh training Hall awm kawpna Multipurpose building pakhat, staff quarters pahnih, tui litre 50,000 dawng water reservoir pahnih leh green house pasarih sak zawh tawh a ni. Transformer pawh dah niin kawlphetha erawh lakluh a la ni lo. Mizoram Orchid Centre sak nana sum ruahman hi cheng nuai 390 a ni a, February 2018 khan thawh tan a ni. Maubuang khua hi nauban that duhna hmun a ni a. Nauban chi hrang hrang neih that lamah India rama dinhmun palina hauhtu a ni.
Mizoram Orchid Centre building leh a chhehvel Minister hian a tlawh kual a. Hnathawktute kutthlak tawhnaa duhthu sam lo lai te enfiahin siam that ngai te siam tha turin a hriattir a. Hawn theih mai tura peihfel thuai a nih a beisei thu RD Minister Pu Lalruatkima chuan a sawi a ni.
Minister hi Sateek leh Maubuang VC leh khawtlang hruaituten an lo dawngsawng a. RD Joint Secretary Pu CC Lalchhuangkima, DRDA Project Director Dr. Andrew H.Vanlaldika leh Rural Development official ten an tawiawm a ni.
