1455/2024-2025

2024 Thlazing ni 5: Tunlaia Mizoram hmun hrang hranga African Swine Fever (ASF) natna leng mek avangin vawk tam tak thi tawhin, Lunglei District-ah pawh he hri leng mek hian kian lam a la pan theih loh avangin he hri laka Lunglei District-a vawkte an lo him theih nan leh hri a darh zel loh nan Lunglei District Magistrate Pu R. Lalthazuala chuan vawiin, August ni 6, 2024 khan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District huam chhunga mipuite zawm turin heti ang hian thupek a chhuah.

"1. Lunglei District chhungah ram dang leh state dang aṭangin vawk, vawksa leh vawksa aṭanga siam ei tur chi reng reng lak luh khap tlat a ni. Tin, Lunglei District huam chhunga khua/veng pakhat aṭangin khua/veng dangah vawk, vawksa leh vawksa aṭanga siam ei tur chi reng reng lak luh khap a ni bawk.

"2. Vawk damlo reng reng talh leh hralh khap tlat a ni a, vawk damlo chu dah hran vat tur a ni.

"3. Vawk damlo emaw vawk thi a lo awmin mahni khua/veng chhunga Task Force-te hnenah rang taka hriattir tur a ni.

"4. Hri lenna hmun (Infected Area)-ah vawk talh khap tlat a ni. Infected Area pawna vawk talh turte reng rengin bialtu Vety Doctor/VFA aṭangin vawk hrisel a ni tih finfiahna certificate an nei ngei ngei tur a ni.

"5. Vawk thi reng reng chinai nen thuk taka phum bo tur a ni a, bawlhhlawh paihna hmunah leh luikawr remchangah vawk thi chu paih hauh loh tur a ni.

"6. ASF vanga vawk thi a lo awmin vawk in/hmun/farm uluk takin disinfectant hmangin sawngbawla tihfai tur a ni.

"He thupek hian chhuah a nih aṭanga ni 60 (sawm ruk) chhung a huam ang a, thupek zawm lote chu Section 223, Bharatiya Nyaya Sanhita (BNS) hnuaiah hrem theih an ni."