1456/2024-2025

2024 Thlazing ni 5: Fur ruahtui tam vangin Theiriat leh Hrangchalkawn inkar kawng NH 54A laih zauh hna thawh mekah lirtheia veivakte leh mipuite'n harsatna an tawh nasat avangin leh hna thawktute'n chak zawka hna an thawh theih nan leh lirtheia kalte tan a him zawk theih nan, Lunglei District Superintendent of Police Pu J. Lalmuankima chuan vawiin, August ni 5, 2024 khan hriattirna chhuahin, The Motor Vehicles Act, 1988 section 115/117 leh Government of Mizoram Notification No.B.12012/10/2004-TRP Dt.1.6.2020 tlawh chhanin lirthei tlan dan tur a hnuaia mi ang hian ruahmanna a siam.

"(i) Theiriat (Hminlokawn) aṭanga Hrangchalkawn inkar kawng hnuaiah hian chawhma dar 9:00 AM - 11:00 AM leh chawhnu 2:00 PM - 5:00 PM-ah lirthei eng chi mah kal phal a ni lo ang a, hei hian Dt. 6/8/2024 aṭanga Dt.15/8/2024 a huam ang. Notification kan lo siam tawh Mizoram Polytechnic leh Hrangchalkawn inkar kawnga Maxi Cab leh a hnuai lam lirthei leh Town Bus service te chauh kal phalna order No.PCL-27/2015/VOL-IV/1603 dt. 29.7.2024 erawh a ngaiin a kal reng ang.

"(ii) Theiriat (Hminlokawn) leh Theiriat thlanmual peng inkar kawng hi a zim avang leh lirthei tan insulpelh a har ṭhin avangin Thawhṭanni aṭanga Zirtawpni zing dar 9:00 AM - 10:00 AM hian lirthei intlan chhawk tura ruahman a ni a, hemi atan hian NHIDCL Company te'n WT set nen duty indahin motor intlan chhawk dan ruahmanna an siam ang. He Notification hi Dt. 6th August, 2024 aṭanga hman ṭan tur niin, thu leh awm hma chu hman a ni ang a, he thupek hian Inrinni, Pathianni leh sawrkar chawlh a huam lo vang. Tin, hemi chungchanga harsatna neite chuan a hnuaia mobile phone no. tar lanahte hian phone theih reng a ni e."

SDPO, Lunglei - 9862596158