1554/2025-2026

Lunglei, 2025 Thlazing ni 7: Tun dinhmunah Lunglei District-ah African Swine Fever (ASF) avanga vawk thi leh suat a lo awm leh tak nual avangin, vawk hrisel la neite ASF laka an lo him theih nan leh a hri dan chah a nih theih nan August ni 6, 2025 khan Lunglei District Magistrate Pi Navneet Mann chuan Section 163, Bharatiya Nagarik Suraksha Sanhita (BNSS), 2023 tlawh chhanin Lunglei District huam chhunga mipuite zawm turin a hnuaia mi ang hian thupek a chhuah:

1. Lunglei District chhungah ram dang, state dang leh district dang aṭangin vawk, vawk sa leh vawk sa aṭanga siam ei tur chi reng reng lak luh khap tlat a ni.

2. ASF hri lenna hmun (infected area) aṭangin vawk, vawk sa leh vawk sa aṭanga siam ei tur lak luh leh lak chhuah khap tlat a ni.

3. Lunglei District chhung khua leh khua inkara vawk, vawk sa leh vawk sa aṭanga siam ei turte inlak pawh tawn khap tlat a ni.

4. Vawk damlo reng reng talh leh hralh khap tlat a ni a, vawk damlo chu dah hran vat tur a ni.

5. Vawk damlo leh suat tur neite'n a rang thei ang berin District Vety Hospital emaw, mahni khua/veng VFA/LC/VC/Task force-te hnenah hriattir vat tur a ni.

6. Vawk thi leh suat reng reng disinfectant (chinai/bleaching) nen thuk taka phum tur a ni a, bawlhhlawh paihna hmunah leh lui kawr remchangah vawk thi an paih tur a ni lo.

7. Vawk talh turte'n RAgT Test an ti ngei ngei tur a ni, RAgT Test-a negative chauh an talh tur a ni a, Soundness Certificate an nei ngei ngei tur a ni.

He thupek hian thu leh awm hma chu chhuah a nih aṭanga thla (2) chhung a huam ang a, thupek zawm lote chu Section 223, Bharatiya Nyaya Sanhita (BNS), 2023 hmangin hrem theih an ni.