2610/2022-2023 

Lunglei the 10^th November, 2022 - Lunglei District chhunga Environment humhalh kawnga Dan hrang hrangte zawm anih theihna tura hmalatu leh thuneitu ‘Lunglei District Monitoring Committee On Compliance Of Environmental Laws’ chu vawiin chawhnu khan an Chairman Lunglei DC, Pu Kulothungan A kaihhruaiin Lunglei DC Conference Hall-ah an thukhawm.

Meeting ah hian Member Secretary Pu PC Lalchhandama, DFO Lunglei leh member dangte – Sub Hqrs YMA aiawh, DLAO, DUDO te an tel a. Hemi bakah hian Department hrang hrang invitees te, National Highways and Infrastructure Development Corporation (NHIDCL) aiawhte leh Lunglei District huamchhunga National Highway hnathawh mek NH-54 leh NH-302 contractor-te ABCI Infrastructure, Bharatia JV (BIPL) leh SRK Constructions Project Manager-te an tel a ni.

Member Secretary Pu PC Lalchhandama, DFO Lunglei chuan Lunglei District huamchhunga NH-54 leh NH-302 hnathawhna hmunah te Verification neih chhuah anih tawh thu leh leivung paihna hmun tura ruat dumping site pawna paih te hmuh anih bakah leivung daltu gabion wall/concrete wall te peih fel kim ala nih loh thu a report a ni.

July ni 28, 2022 khan Lunglei DFO Pu PC Lalchhandama kaihhruaiin NH 54A leh NH 302 ah verification neih a ni a. September ni 6, 2022 khan Lunglei Additional DC Pu V. Lalruatliana kaihhruaiin NH 54 Package VI - Tawipui N I&II, Tawipui South leh Thingfal ah te verification neih niin September ni 17, 2022 ah khan Lunglei DC Pu Kulothungan A kaihhruaiin Thualthu, Bualte, Thaizawl, Lungpuizawl, Zobawk, Hrangchalkawn, Theiriat leh Dawn ah te Verification neih a ni.

Vawiin meeting-ah hian heng Verification Report te hi zirho niin contractor te hmalak tu hrang hrang te sawiho a ni a. Designated spoil bank-a leivung dalna la awmloh naah te kumin December thla ral hma ngeia siam tur leh fur ruahtui avanga chhe tawh te pawh a repair hna thawk zo tura hriattir an ni.