Vawin khan Lunglei District Police Half Yearly Crime Review meeting SP Conference Hall Lungleiah neih a ni.

He hun hi Lunglei Addl. SP Pu J. Lalmuankiman  a kaihruai a, hawnna thu tawi sawiin nikum 2016 aiin kumin 2017 hian pawi khawihna zat nasa takin a tla hniam a, hei hi Lunglei District chhunga Tlawmngai pawl, kohhran leh mipui te nen an thawh hona rah a ni tiin lawmawm a tih thu a sawi. Review Meeting in a thlirlet danin kumin January atang a June thla chhung khan thubuai 107 ziah luh tawh niin thubuai 72 chu chin fel tawh a ni a, thubuai 35 la chinfel loh a awm bawk a ni. Special Report Case 13 awmah pawngsual thubuai 2, tualthah thubuai 1 leh tang tlan chhuak 1 bakah POCSO Act hnuaiah thubuai 4 leh ND&PS Act ah thubuai 5 ziahluh a ni.

MLPC Act hnuaiah mi 264 man an ni a, heng zinga 3 te hi thubuai siam sak an ni a,  kumin kum chanve chhung khan Lunglei District chhunga motor chetsualah mi 3 thiin mi 7 inhliam an awm a, kumin chhunga Traffic dan bawhchhiate sum chawi tlingkhawm hi Rs 6,39,150/- lai a tling tawh a ni. Kumin kum chanve chhung khan Lunglei District chhungah thih dan pangngai lova thi 25 an awm bawk. Vawiina kum chanve Crime Review meeting chuan a tarlan danin Nikum 2016 kum chanve chhung khan IPC hnuaia thubuai ziah luh 150 a awm laiin kumin ah chuan 94 chauh a ni a, Local & Special Laws hnuaiah nikum kum chanve chhungin thubuai 166 a awm laiin kumin ah chuan 107 chauh a awm a, kuminah pawi khawihna a tlak hniam thu sawi langin thubuai kal mek te pawh an thlir ho nghal a, Lunglei District chu dan leh thupek kenkawh chung changah a muanawm hle a an hriat thu an sawi lang bawk a ni.

Vawiina Crime Review Meeting ah hian Dy. SP.Lunglei, SDPO  Lunglei, Hnahthial, Tlabung leh Lunglei District chhunga Police Out post hrang hrang a OC te bakah Lunglei PS hnuai a Investigating Officer te an tel tha hle ni.