Vawiin chawhma dar 11:30 khan Serchhip DC Meeting Room-ah Bawrhsap Pi Sangchhin Chinzah, MCS kaihhruaiin kumin Independence Day, August ni 15 a lo awm tur lawm dan tur relin an thukhawm.

Chairman Pi Sangchhin Chinzah chuan, India ramin zalenna a hmuh champha lo thleng tur lawmnaah Serchhip a khuallian tur hi sawrkar thuchhuak ngaihchan mek anih thu a sawi a, he ni hi hlawhtling taka hman a nih theih nan mawhphurhna kan insem te tha taka hlen vek tum turin kalkhawm te a ngen a ni.

Ruahman ang chuan he ni hi Khawtetlang a DC Playground ah zing dar 10:30 ah hman tur  ani ang a, chhun dar 12:00 ah VIP's at Home Tea Party, DC Bungalow tualah neih a ni bawk ang. Independence Day ah hian Parade Contingent 13 beisei an ni a, Parade-a tel tur School naupangte hriselna chungchang ngaihpawimawh nise tih a ni. He ni pual hian Home hrang hrangah te bakah District Jail-ah te thilpek hlan an ni bawk ang.

He ni hlawhtling taka hman a nih theih nana tih tur pawimawh leh mawhphurna hrang hrangte chu Department hrang hrangte, School leh Police te, tlawmngaipawl leh mimal hnenah a tul anga sem darh a ni a, meetingah hian Department hrang hrang aiawhte, Chanchanbumi aiawhte leh tlawmngaipawl aiawhte an tel a ni.

E.Lungdarah pawh Independence Day lawm dan tur rel hian Pu Vanlaltanpuia, MCS, BDO Office-ah thuhkhawm a ni a, ruahman dan chuan zing dar 7:30 ah Bazar kawnah hun hman a ni anga, Pu Vanlaltanpuia, BDO chuan hnam puanzar a pawt pharh ang. He ni lawmna hlawhlting taka hman anih theih nan mawhphurhna leh chanvo hrang hrangte sem niin, he ni lawmnaah hian sawrkar hnathawk zawng zawngte kim taka kal tura beisei an ni bawk a ni.