Mizoram sorkarin ramin hma a lo sawn lehzual nan leh hnamzia leh nunphungte chawikan nan mi zawng zawng tana a ruahman New Economic Development Policy (NEDP) hnuaia hmalakna chi khat ‘Business Plan Contest’ (Mizoram Kailawn) chu vawiin khan I&PR Auditorium-ah Planning & Programme Implementation Minister Pu Lalsawta’n a hawng a. Planning & Programme Implementation Secretary Dr.C.Vanlalramsanga kaihhruai he B-Plan Contest hawnna inkhawmah hian sorkar officials leh department aiawhte bakah IIM Calcutta CEO Pu Subhrangshu Sanyal leh a thawpui te, Mizoram Entrepreneurship Development Monitoring Committee (MEDMOC) member-te, Entrepreneurship Master Trainers leh Trainess, media persons bakah mi sawm bikte an tel.

‘Mizoram Kailawn’ hawngtu Khuallian Planning Minister Pu Lalsawta chuan ramchhunga zirna in hlun berte zinga mi IIM Calcutta-Innovative Park mithiamte nen NEDP hnuaia entrepreneurship scheme-ah sorkar-in thawhhona a nei thei chu vanneihthlak a tih thu a sawi a; sorkar chuan NEDP kaltlangin mirethei leh tanpui tlakte tanpui zel a tum bakah NEDP hmangin Mizoram hmel tihdanglam leh bung thar kaipui a beisei a ni a ti. Pu Lalsawta chuan Mizoram thalaite tan hna a vang tan tawh hle a, he harsatna sutkian nan NEDP chu kawng awmchhun leh thlanawm ber a ni tiin NEDP chu politics khelhna emaw politics lama hamthatna duh emaw vanga buatsaih a nih loh thu leh hei hi hun lo kal zel turah pawh chhawrnahawm tura ruahman a ni a ti bawk. Sorkar-in NEDP a kalpui zelna leh a hlawhtlin theih nana theihtawp chhuahtu sorkar offcials, sorkar departments, MEDMOC member-te leh entrepreneurship-a inhmang leh tui mi zawng zawngte chungah lawmthu sawiin NEDP-ah hian a sultu tur ber 3 - kuthnathawktu (farmers), sumdawng (entrepreneurs) leh sorkar - te bakah UNO leh UNDP te pawhin NEDP an thlawp thu a sawi bawk. Mi tupawh “a ngaihna hria” leh “ngaihtuahna themthiam” te chu NEDP Business Plan Contest-ah telin an thiamnate hmang tangkaia, ram leh hnamin hmasawnna bung thar a kai theih nan rawn pen chhuak turin a sawm a ni.

Planning & Programme Implementation Secretary Dr.C.Vanlalramsanga chuan NEDP leh B-Plan Contest (Mizoram Kailawn) chungchang hrilfiahna hun a hmang a, Mizoramin hmasawnna bung thar a kai theih nan tanlak theihna apiangah sorkar chuan tanlak zel a tum a ni a ti. NEDP chuan zau leh kim thei ang berin hmasawnna kawng hrang hrang awm theite chu a huap dawn a, NEDP hnuaia ruahmanna hrang hrang kalpui dan tur (strategy) fel tak siam a nih thu a sawi bawk. Tun dinhmunah Mizoramah lehkhathiam leh hnathawk thei mihring zat (educated & employable population) kum 15-59 inkar hi an tam hle a, sorkar hnain a daih dawn loh avangin skill development leh entrepreneurship lamah tanlak a pawimawh hle a, kawng awmchhun niin a lang bawk a ni a ti. NEDP hmalakna peng pawimawh ber pakhat Entrepreneurship Development Scheme (EDS)-in a tum ber chu sorkar hna ringawta innghat lova mahni kutkawih eizawnna kawng zawh thei tura mipui, a bik takin thalaite buatsaih a ni a; he Scheme kalpuinaah sorkar chuan mipui mamawh - kawlphetha, kawng, tui, khawpui leh thingtlang lam tichangtlun bakah hmalakna apiang uluk taka vil chu a tih tur pawimawhah a dah a. NEDP atan sorkar chuan kum 2016-2017 ah cheng vaibelchhe 250 leh kum 2017-2018 atan cheng vaibelchhe 750 a dah tih a tarlang bawk. 

Mizoram sorkar-in B-Plan Contest leh EDS-a a thawhpui tur IIMC-Innovative Park CEO Pu Subhrangshu Sanyal chuan state sorkar hrang hrangin entrepreneurship hmangin hmasawnna kawng an zawh mek a, IIMC pawhin engemawzat chu thawhpui nei mahse Mizoram sorkar chiah ruahmanna (structure) felfai tak siam awmchhun a ni a, chuvangin NEDP hmalakna hi a hlawhtling ngei a rin thu a sawi a. Mizoramah IIMC chu a mikhual loh thu sawiin Pu Sanyal chuan kum 2 kalta atang khan Mizoram University te nen thawhhona an neih tawh thu leh MEDMOC nen thawhhona thuthlung MoU pawh an ziak a ni, a ti.

NEDP hnuaia Entrepreneurship Development Scheme hi chhawng hniha kalpui tur a ni dawn a. A hmasa zawk, vawiina Planning Minister-in a hawn tak - ‘Business-Plan Contest (Mizoram Kailawn)’ - hi July ni 21, 2017 atangin online tan tur a ni a, an website www.mizoramkailawn.org-ah a duh apiang tan August ni 31, 2017 thleng entrepreneurship project thehluh theih a ni  a; heng project lutte zinga tha thlanna result chu September ni 25, 2017-ah puan a ni ang a, heta tlingte tan Group Camp leh Training buatsaih a ni ang. A chhawng hnihna - Entrepreneurship Summit - hi October ni 10, 2017 ah neih a ni ang a, hetah hian B-Plan Contest Final Result puan a ni bawk ang.

'Mizoram Kailawn' hawnna inkhawm hi I&PR Director Pi Lalnithangi'n lawmthu sawina hun hmangin a khar a. Hemi hnuah IIM Calcutta atanga lo kalte leh chanchinthar lakhawmtuten 'Press Meet' an nei zui a; IIMC mithiamte chuan MEDMOC leh EDS-NEDP hnuaia Master Trainers te nen inkawmhona an nei zui nghal a ni.