Vawiin khan Lunglei District chhunga Presiding Officer leh Polling Officer-te tan Saikuti Hall, Lunglei-ah Training buatsaih a ni a, Lunglei DC/DEO Pu V.Sapchhunga chuan inthlannaa an mawhphurhna leh hna thawh dan tur hrang hrang hrilhfiahin he Training hi a hawng a ni.

Vawiina Training neihah Lunglei DEO-in Presiding Officer leh Polling Officer-te tan hriat tur pawimawh zual a tarlan te chu :

1.         Presiding Officer/Polling Officer emaw Officer dang tupawh Election buaipui tura ruatte reng reng chu Representative of the People Act, 1951 section 28A-in a sawi angin Election Commission thuneihna hnuaia awm leh tih tur a tih apiang ti tura awm an ni.

2.         Presiding Officer-te chu an awmna Polling Station-ah chuan an thu ber ang a. Inthlanna ‘free & fair’ awm theihna tura mawhphurtu an nih ang bawkin, thil duhawm lo/dik lo awm chungchangah pawh an  mawhphurhna a ni ang a, midang hnenah hlanchhawn theih a ni lo.

3.         Presiding Officer-te chuan EVM hmandan chiang takin an hre tur a ni a. Tunhmaa la awm ngai lo ECI duhdan angin EVM hman turah ‘None of The Above’ (NOTA) Button hmeh tur a awm dawn a ni.

4.         Presiding Officer-te chuan inthlan hmain Polling Agent-te mithmuh ngeiah EVM khawlah engmah a awm lo a ni (a ruak a ni) tih a tilang ngei ngei tur a ni a, hemi atan hian vote thlak chhinna ‘Mock Poll’ neihpui ngei ngei tur a ni.

5.         Thlalatu awm remchan lohnaah mobile phone-a camera hmanga thlalak phal a ni a, Presiding Officer-te Lunglei an thlen veleh hun remchang hmasa berah MCMC hnenah an thla lakte an thehlut tur a ni.

6.         Presiding Officer-te chuan Vote thlak dan Report a rang thei ang bera an peihfel tur a ni.

7.         Inthlan ni ah Polling Station tinah Booth Level Officer-te chu Mobile Phone nen nilengin an awm ang a, signal awm that lohna hmunah BLO kaltlangin emaw W/T Operator duty kaltlangin emaw Report pek theih a ni.

Inthlan Ni 25 November 2013 (Thawhtanni)-ah chuan Polling Station zawng zawngah zing dar 7:00 atanga tlai dar 4:00 thlengin vote thlak theih a ni ang a. Lunglei District atan General Observer 6 ruat an ni a, a tul an tih chuan Micro-Observer an ruat theih bawk ang a, anni hian Inthlan Ni-ah zing atangin polling station-te an vil dawn a ni.