95/2025-2026

Lunglei, 2025 Ṭau thla ni 8: Vawiin khan Lunglei District Deputy Commissioner Office hma laknain District mipuite'n chiang zawka sawrkar hma lakna an hriat a, an chhawr ṭangkai theih nana an kawkaia kal chilha service hrang hrang chhawp chhuahsakna, "I Kawtkaiah Sawrkar" (Prashasan Gaon Ki Ore) hun chu Ralvawng khaw mipuite tan VC House, Ralvawngah buatsaih a ni.

Lunglei District Bawrhsap Pi Navneet Mann chuan Lunglei District thingtlang khaw kilkhawr zawka chengte'n sawrkar hma lakna hrang hrang an hriat a, awlsam zawka sawrkar office an dawr theihna tura office inpho chhuakte hnenah lawm thu sawiin, he hma lakna hi chhawr ṭangkai tum ṭheuh turin Ralvawng mipuite chu a chah a. Sawrkarin khua leh tuite hamṭhatna tur a ruahman hrang hrangte chuan District mipui a chhawrtu tur takte hnen a thlen theih nan district administration chuan theih tawp a chhuah zel dawn tih a sawi.

He hun hi Lunglei District Additional Deputy Commissioner Pi Zoramdini chuan a kaihruai a. Mipuiin khawpui pan kher ngai lova awlsam zawka sawrkar office hrang hrang an dawr theih nana "I Kawtkaiah Sawrkar" tih programme ruahman chu ṭangkai taka hmang turin mipuite a sawm a ni.

Vawiina Ralvawnga "I Kawtkaiah Sawrkar" tih hun buatsaihah hian office hrang hrang - Deputy Commissioner, Election Branch, Agriculture, Horticulture, Power & Electricity, Irrigation & Water Resources, Block Development Office, Animal Husbandry & Veterinary, Social Welfare, District Civil Supply Office, Commerce & Industries, Health & Family Welfare, Land Resources, Soil & Water Conservation leh SBI Lead Bank Office te'n stall hawngin, awlsam zawka mipuite dawr theih turin an inpho chhuak a. Electoral roll enfiah/inziah luh, Aadhaar siam ṭhat/siam thar, member belh/paih leh ration card leh Aadhar link, bank account hawn thar, sawrkar scheme hrang hranga inziah luhna leh mipuiin harsatna an thlenna hun te buatsaih a ni.

I Kawtkaiah Sawrkar programme hi a thawh khat nan January ni 14, 2025 khan Haulawngah buatsaih a lo ni tawh a. Tuna Ralvawnga buatsaih hi Lunglei District-a a ṭum hnihna niin, khaw hrang hrangah la kalpui chhunzawm zel tura ruahman a ni.

Vawiin vek khan Lunglei District Bawrhsap Pi Navneet Mann chuan Ralvawnga zirna in hrang hrang - Government Primary School, Government Middle School leh RMSA Higher Secondary School bakah,  Health & Wellness Centre te tlawh kualin, an dinhmun a enfiah nghal a ni.