96/2025-2026

New Delhi, the 8th of April, 2025: Vawiin chawhnu khan Mizoram Sports & Youth Services Minister Pu Lalnghinglova Hmar chuan New Delhi ah Ministry of Youth Affairs and Sports hotute a kawm a, Mizoram thalaite hmasawnna kaihhnawiha hmalakna kal mek leh hmathlir te a sawipui.

Sports Minister Pu Lalnghinglova Hmar chuan Pi Sujata Chaturvedi, Secretary to Government of India, Department of Sports, SAI Director General ni bawk hmuin Mizorama SAI Training Centre tihchangtlun dan tur a sawipui a, ziak a ruahmanna a thehluhte chu an lo bawhzui tur thu DG, SAI chuan a lo hrilh. April ni 26 a 'Aizawl International Half Marathon' neih turah Sports Authority of India hriatpuina leh pawmpuina dil pawh DG, SAI chuan hmalak pui ngei a lo tiam bawk a ni. 

Youth Services Minister Pu Lalnghinglova Hmar hian Pi Meeta R. Lochan, Secretary to Government of India, Department of Youth Affairs pawh New Delhi-a a office-ah hmu nghalin Mizo thalaite'n state pawna 'exposure' tam zawk an neih theih dan tur a sawi pui a, Mizo thalaite tana tangkai thei Ministry hmalakna kal mek leh hmachhawpte an sawi dun. 

Pu Lalnghinglova Hmar chuan kumin kumtawp lamah Mizoram-a thalai intawhkhawm lian (Youth gathering) huaihawt a duh thu leh, ziak a rawtna a thlen thuai tur thu a hrilh a. Rawtna a awm hunah a lo bawhzui sak thuai tur thu Youth Affair Secretary Pi Meena R. Lochan chuan a lo hrilh a ni. Youth Hostel sak chungchang pawh sawi dunin, written proposal nen inkawm leh thuai tum a ni.