97/2025-2026

Lunglei, 2025 Ṭau thla ni 8: Vawiin khan Lunglei Municipal Council (LMC) Chairman Pu Lalzuithanga kaihhruaiin LMC hotute leh Lunglei PHED official-te chu Lunglei khawpui chhunga tui harsatna thleng mek chungchang leh a sut kian nana hma lak dan tur te sawi hovin an ṭhu khawm.

He ṭhut khawmah hian LMC Chairman Pu Lalzuithanga leh Vice Chairman Pu K. Lalrinawma te bakah, executive councillor-te, chief executive officer leh Lungleia PHED hotute an tel a. PHED Lunglei Water Supply Maintenance Division-a Executive Engineer Er V. Laldanmawia chuan kumina tui hna kang chu kum dang aia a nasat thu leh ruah a sur mai loh chuan buaina lian zawk tawh theih a nih thu sawiin, department lam chuan tui pump-na tur khawl nei ṭha mah se, a pump tur tui a awm miau loh avangin Lunglei khawpui chuan harsatna lian tak a tawk mek tih a sawi a. Tlawng luia Concrete Gravity Dam siam mek chu a hna thawktu contractor-in zawh hun tura tihah a zawh hman loh avangin thla 6 dang atan pawh seisak a ni tih a sawi a. Tun dinhmunah Lunglei khawpui chhungah tuikhur 90 a awm thu leh a thianghlim em tih enfiah zel a nih thu sawiin, a tam zawk chu a thianghlim tawk loh avangin laboratory-ah endik leh mek a nih thu leh tuikhur tui chu ei leh in atana ring chuan chhuang so hmasa zel se an duh, tih a sawi bawk.

He ṭhut khawmah hian tui harsatna avanga Lunglei mipuite'n harsatna an tawh mek dan leh tui harsatna su kiang tura hma lak dan tur te sawi ho niin, mihring thunun theih loh khuarel thil vanga harsatna thleng a nihnaah mipuite pawhin hriat thiam a ṭul thu te, tui hna tipung tura hma lak, ruah tui khawlna ṭha ruahman leh tui renchem kawngah mipuite'n ṭan lak a pawimawh thu tar lan a ni bawk.

PHED hotute chuan ramngaw chereu nasat avangin tui hna kang chat tam tak a awm tih sawiin, tun dinhmunah Lungleiah tui connection 16,012 a awm mek thu leh consumer-te hnena tui sem chhuak vek tur chuan thla khat dawn nghah a ngaih tur thu an sawi.

Attachment

  • Loading attachment...